Baroto sa ungo gipikaspikas

Panadtaran, San Fernando, Cebu

Nasuya pag-ayo si Bador kang Melon kay dili gyud magtingogtingog labi na’g imong hisgutan sa dalan. Dugay na nilang silingan kini si Melon ug sa ilang pagka-silingan ingon sa walay reaksiyon sa panagdait ang magtiayon nga Melon-Takya.

            Si Melon kanunay’ng moadto sa dagat ug si Takya naa pud kanunay sa iyang labada. Wala kini silay anak. Ug alang kang Bador dili maayo ang gipakitang lihok ni Melon nga dili lang gyud magtagadtagad sa iyang mga silingan.

            “Lain gyud na’g batasan nang tawhana, Bay Cosme,” ni Bador pa ngadto sa usa sa iyang mga silingan.

            “Bitaw tuod, kausa ako nang nasugatan si Melon, dukoduko lang ug way tingogtingog. Ako pa gani ang misangpit kaniya,” ni Cosme pa usab nga mipadayag sa iyang naobserbahan ni Melon.

            “Kanang moagi siya dinhi nga magdalag daghang isda nga iyang nakuha, di gyud mohatag bisag pipila lang ka buok, dawo sab kaayo nang tawhana,” ingon sa naglagot na si Bador. “Kana ra bang iyang asawa nga si Takya, apo ra ba nang Inting Kalugti nga puwerteng ungoa nga matud pa mangabat bisa’g daghang tawo...”

            “Mao ba diay, Bay Bador,” kalit nga nataas ni Cosme ang iyang tingog. “Abi nimo, Bay Bador, ang namatyan sa akong tatay mao ang balbal sa ungo. Gibalbal ang akong tatay samtang siya natulog sa iyang sakayan sa didto pa kami magpuyo sa isla. Daghan kaayong ungo didto sa isla Taghoytaghoy. Ug nanumpa gyud ko, Bay Bador nga kun dunay kaliwat og ungo nga akong mahibaw-an, ako gyud ang mangunay pagpatay niini!”

            “Aw, kana sila si Melon ug Takya, atong panid-an. Ug aron gyud nindot atong gub-on ang iyang baroto...” ni Bador pa nga mitingsi.

            “Sige, Bay Bador, kay karong gabii, dad-on nako kadtong hait nakong atsa ug atong pikaspikason ang sakayan ni Melon,” ni Cosme pa nga nagpangagot ang mga ngipon. “Tuod, nianang pagka-gabii, ilang giatsa ni Bador ug Cosme ang baroto ni Melon. Giayo nila’g pikaspikas ug unya ang mga pinikas ug binugha ilang gidala sa ilang balay aron maoy himuong sugnod sa ilang abohan.

            Pagkasunod gabii, misibaw ang tingog sa Wakwak dayon may mikikik ug unya mibalik na pud sa pagwakwak. Dugay nga miundang ang pagwakwak nga nagbahisbahis didto sa itaas nga mora’g naglupad-lupad.

            Pagkasayong buntag diha na si Melon sa tugkaran nilang Bador. Isog kaayo kining namulong: “Nganong inyo man tawon nga gipikas-pikas ang akong baroto, unsa may sala nako ninyong duha ni Cosme?”

            “Unya, unsa man, suko ka ha?” Nanaog si Bador nga nagdalag pinuti.

            Tungod kay andam na si Bador nga motigbas kang Melon maong milakaw na lang kini pahilayo sa balay nilang Bador. Unya nianang pagka-gabii, gisaka silang Bador og mangtas nga iro nga itom og kolor. Gipamugno ang asawa ug duha ka mga anak ni Bador ug hasta pud ang asawa ug mga anak ni Cosme, gisaka pud og bangis nga irong itom ug gipangpaak-paak sila niini. Wala hinuon patya sa iro apan grabeng mga samad ang nadawat sa pamilya ni Bador ug ingon man kang Cosme.

            Udtong tutok, gisulong nilang duha ni Bador ug Cosme si Melon didto sa ilang balay. Si Takya ra ang nahabilin kay si Melon miadto sa dagat nianang gabii aron mamasol. Misaka dayon si Bador sa taas ug gikuptan og hugot si Takya. Dayon gibuhoan sa iyang sinina si Takya, ug gipahimuslan siya ni Cosme. Humang Cosme mipuli si Bador.

            Way nahimo si Takya nga mitugyan sa duha ka salbahis nga naglugos pagdimdim sa dugos sa iyang katahom. Ug tungod sa ilang kaluya ni Bador ug Cosme nakatulog sila ug sa ilang pagmata may usa ka itom nga iro nga nag-apong kanila.

            Dihadiha gipamugno silang duha ug giayo gyud og kuniskunis ang ilang kalawasan ug gihabwa pa sa mangtas nga iro ang ilang mga tinai ug atay. Pagkahuman gitagsatagsa pagtangag sa iro ang ilang mga lawas ug gidala paingon sa baybayon. Ug daghang nahibulong sa pagkahanaw sa duruha. (Kataposan)