Ang pangandoy ni Tatay

"Dong, maayo gyod ang kursong Marine Engineer kay dako kaayo’g suweldo." Damgo ni Tatay Andot namong duha ra niyang anak lalake. "Mao ra ni makahaw-as sa atong kalisod. Niya pa nga mihangad sa itaas sa bilding niadtong paghitungod namo sa Cebu Central Colleges.

Apan namatay nalang siya, wa gyod kini matuman. Unsaon, ang USC, diin ako mag-working, wala man ining kursoha. Wa gyod sab koy hilig mag-Marine Engr. Nakahuman gyod ko’g laing kurso sa kaugalingon kong kayod ug nakatrabaho’g arang-arang nga kompaniya.

Pagka collge ni Landie, bugtong kong manghod, kinsa sukad pa sa hayskol akoy naggasto, wala poy gustong mag-Marine Engr. BSE Major in PE maoy gikuha. Ang nakaparat kay wa magtarog eskuyla.

Uyab-uyab ang gipalabi, nakabuntis. Ug napugos sa pagpakigminyo. Bisag may asawa na siya, gipadayon ko gihapon ang pagpaeskuyla sa badlongon kong igsuon. Hangtod nakagradwar gyod kini. Malas lang, kay wala siya kapasar sa bord eksam. Busa sa mamaligyaay na lag feeds ang produkto nanarbaho, diin gamay da tawoy suweldo.

Paggraduwar ni Darryl sa hayskol, iyang kinamagulangang anak, among hisayran nga buot kini’g mag-Marine Engr. Nalipay ko kay basig si Darryl maoy makatuman sa gipangandoy ni anhing Tatay nga wala namo mahimong managsuon. Busa naningkamot gyod ko nga matabangan ang akong pag-umangkon.

Nahimo siyang scholar sa Norwegian Company ug migradwar nga Magna Cum Laude sa UC. Nakapasar dayon sa pasulit ug nakasakay gilayog barko. Paspas kaayo iyang promosyon. Dako na kaayo’g suweldo. Di na nako maabot. Gitabangan kaha siya sa kalag ni Tatay? (Katapusan)