Ungo midagan sa eleksiyon

Gipakaylap na ni Martin nga siya modagan pagka-mayor dinhi sa ilang lungsod sa Tikyaob batok sa tadhan na kaayong mayor nga si Mayor Conrado. Ug tungod niini ingon sa mikuyanap nga dakong sunog ang maong balita ug kini nakapaukay sa kampo nilang Mayor Conrado.

Apan wala batia’g kabalaka si Mayor Conrado kay alang kaniya sip-onon ug apyogon pa kaayo kini si Martin nga maoy mobatok kaniya karong umaabot piniliay pagka-mayor.

Apan gibati og dakong kabalaka ang iyang mga leader labi na kang Tanciong nga suheto sa pagkatawo ni Martin.

Sayod siya nga dunay dakong bahandi nga sundonon si Martin gikan sa iyang mga ginikanan ug kini anaa na karon sa iyang pangalan. Dato og kaliwat sila si Martin.

Ang iyang amahan nga si Benito gituohan nga nakakawot og bahandi maong nakapalit og daghang mga kabtangan sama sa yuta, balay, yate, mga sakyanan ug duna pay mga negosyo nga gipadala lang og laing tawo.

“Mao nay akong gikuyawan, Mayor,” ni Tanciong pa ngadto sa iyang amo nga mayor nga si Conrado. “Kun mobubu og dakong salapi si Martin, seguradong magtakilid ka na...”

“Hoy, Tanciong, basig nalimot ka kun kinsa si Mayor Conrado,” mora’g mitaas ang tingog sa mayor. “Wa pay nakapildi nako sukad. Nahinumdom kang Gumer, nga dunay dakong construction & engineering business, unsay iyang gidangatan nga nakigbatok nako, di ba akong gilubong og tagilapaw...”

“Aw, o, uy, Mayor. Didto sa bukid, haros ka, pero kun sultihan tika nganong dili na magsilbi ang imong estratihiya panahon sa gabii?”

“Kay ngano man diay, Tanciong?” gustong mahibawo ang Mayor.

Gipaagi sa hunghong duol sa dunggan ni Mayor Conrado ang buot isulti ni Tanciong. Unya, kalit lang mipahiyom si Mayor Conrado.

“Ungo god tawon. Wala na kana karon, uy. Tabitabi lang na sa mga balhiboog dila nga dunay ungo. Aw, kun tinuod nang imong gisulti, duna man koy mga hinanib, sayod ka na, Tanciong. Abilidad ang akong gamiton, sama sa naandan. Ug kana si Martin, wala pay hustong kasinatian bahin sa politika,” miigham si Conrado.

“Mayor, naa na kaniya karon sila si Gabriel ug Isyot. Namiya na gikan sa atong kampo,” matud ni Martin. “Suheto gud nang mga tawhana unsaon pagmaniobra og tinonto nga mga botos, Mayor. Dato si Martin, Mayor, dato siya; busa, usa ka dakong gubat karon ang atong sagubangon...”

“Unya, ako, Tanciong, dili ko dato, ha?” mora’g nasuko ang Mayor ngadto kang Tanciong.

“Aw, dato man sab ka, Mayor pero, ungo man gud si Martin.”

Tuod, dihang miabot ang piniliay gipadad-an og mga armadong hinanib ang mga presinto sa kabukiran ni Mayor Conrado. Kini aron atngan ang mga taga bukid nga dili makaabot sa ilang mga tagsatagsa ka presinto.

Apan dakong demalas kay giatngan sila’g daghang mga sigbin ug wala magsilbi ang mga private army sa Mayor, kay gipangbugno ug gipanglutos sila sa mga sigbin ug ang uban nangahulog sa lawom nga mga lugot.

Dinhi naghangos nga mitaho si Tanciong sa nahitabo sa mga hinanib ni Mayor Conrado.

“Mao na, Mayor, giatngan sila’g mga sigbin, ug wala sila’y nahimo, ug hasta gani ko, milayat na lang sa lugot....” nagkayungit si Tanciong.

Tuod, midaog gyud si Martin kang Conrado ug karon siya na ang mayor sa lungsod. Matag gabii, may namatikdan ang mga polis nga dunay magluksolukso sulod sa Munisipyo. Dihang gisusi, nakita sa polis ang daghang mga sigbin. (Kataposan)