Nalangan nga kabuntagon

Gula 81

Inanay nga naulian sa panimuot si Destiny. Dihang hingpit na siyang gibalikan sa kahiamgo, mikipatkipat ang iyang mga mata. Maoy iyang namatngonan ang pagsakit sa iyang bukton. Gipaliraw niya ang iyang panan-aw. Maoy iyang nakita dapit sa iyang ulohan ang gibitayan sa bag sa dugo ug sa dextrose. Iyang nasuta nga diha diay siya sulod sa usa ka lawak sa tambalanan.

Misulay siya sa paglihok apan gipiog siya sa kaluya. Kapoy ang iyang lawas. Nabatyagan niya ang pagsakit sa iyang pulso.

Nahinumdom na siya sa nahitabo kaniya. Gihiwa niya sa blade ang iyang pulso kay buot siyang magpakamatay. Buot siyang mounong sa iyang kuya Evan sa pagpakamatay kay buot silang molikay sa tulisok sa ilang mga ginikanan.

Apan naluwas siya sa kamatayon. Kinsay nagluwas kaniya? Kinsay nagdala kaniya dinhi sa ospital?

Miliraw na usab ang iyang mga mata sa palibot sa lawak. Gipangita niya si Evan. Apan wala niya makita ang iyang maguwang. Nag-inusara lang siya sa lawak nga iyang nahimutangan.

Hain man kaha si Evan? Kun dunay tawo nga nagluwas kaniya, nganong wala man usab niini luwasa si Evan? Nganong siya ra man ang gidala sa iyang manluluwas dinhi sa ospital?-- Sumpayan pa