Ulipon sa gugma

Gula 21

May dalang sakyanan si Harvey. Mitanyag ang ulitawo kang Abigail nga ihatod siya niini ngadto sa iyang boarding house.

“Salamat na lang,” mibalibad si Abigail. “Mag-tricycle lang ko.”

“Please,” nangaliyupo si Harvey. “Ayaw ko’g balibari. May mahinungdanon kong tuyo nimo maong gihulatan ko gyud ikaw nga mahuman mo’g practice si Michael sa inyong sayaw.”

Na-feel ni Abigail nga nanginit ang iyang aping sa iyang nadungog gikan kang Harvey. Nasayod na diay si Harvey nga kanunay siyang makig-practice og sayaw uban kang Michael. Tingali, gipanid-an gayod ni Harvey ang iyang mga lihok maong nasayod kini sa iyang mga gibuhat.

“Tana, Abigail,” agda ni Harvey.

Milingi-lingi si Abigail. Unya gipaundayonan niya si Harvey. Misakay siya sa Toyota Lite Ace nga sakyanan sa ulitawo nga naghunong sa tungod gayod sa main lobby sa tulonghaan.

Gipadagan dayon ni Harvey ang sakyanan dihang nakapahimutang na sila sa sulod. Wala dangtig dugay, namatikdan ni Abigail nga dili paingon sa iyang boarding house ang dalan nga ilang gisubay.

“A-asa ko nimo dad-a?” Nakapangutana si Abigail nga mibatig kabalisa.

“Masayran mo ra unya kun atua na kita didto,” maoy tubag ni Harvey. “Ayaw kabalaka. Wa koy daotang tuyo nimo. Human sa atong panagsulti, ihatod ko ikaw sa imong gipuy-an.”

Wala na magtingog si Abigal.

Paglabay sa pipila ka gutlo nga pagdagan sa sakyanan, nahiabot sila sa Food Park sa dakbayan sa Ormoc. Gipahunong ni Harvey ang sakyanan.

“Manihapon una ta,” nagkanayon si Harvey. “Nasayod kong wa ka pay panihapon.”

Wala na lang mo-ik si Abigail.

Nanganaog sila sa sakyanan ug misulod sa usa ka barbecue stall. Nangaon sila. Pagkahuman, gidala si Abigail ni Harvey ngadto sa plasa.

“Nagkasuod na gyud diay mo’g maayo si Michael, no?” Si Harvey ang mibukas sa ilang panagsulti.

“Di man tingali daotan kun makigsuod ko niya?” Sikmat ni Abigail.

“Dili daotan para nimo. Pero para nako, dili maayo’g makigsuod ka kaniya. Ikaw mismo nasayod nga dili siya maayo’g reputasyon sa atong tulonghaan. Busa dili ko gustong makigsuod ka kaniya.” -- Sumpayan pa