Ulipon sa gugma

Gula 13

Namugos gyud si Harvey nga makigsulti kang Abigail. Wala na makabalibad ang dalaga. Nanggawas sila sa school campus aron magkasulti sila’g maayo. Misulod sila sa usa ka snack bar nga nahimutang dili layo sa ilang eskuylahan. Mi-order si Harvey og esnakunon alang nila.

“Unsay atong panagsultihan, Harvey?” Si Abigail ang mibukas sa ilang panagsulti.

“Ngano bang molikay ka na man gyud nako?” Misumbalik pagpangutana si Harvey. “Dili ka na makalimod, Abigail. Klaro kaayo nga gusto ka gyud nga molikay nako. Ngano man, Abigail? Unsay hinungdan nga buot ko nimong likayan?”

“Tungod kay mao kanay gustong mahitabo ni Krista,” laktod nga tubag ni Abigail.

“U-unsa?“ Mikunot ang agtang ni Harvey.

“Nakigsulti si Krista nako niadtong nakalabay’ng adlaw. Gusto siyang molikay ko nimo. Mao kanay iyang gihangyo nako.”

“Sa unsa man kuno nga katarongan nga gibaoran ka man niya sa paglikay nako?”

“Tungod kay dili siya gusto nga may laing babaye nga moporma nimo.”

“Unsa?”

“Sa akong analysis, mora’g dako na’g katungod si Krista sa imong kinabuhi, Harvey. Nagkatrato na man kuno mo?”

“H-ha?”

“Ayaw na lang pagpagoryo-goryo, uy. Nabaniog na sa atong eskuylahan ang maong isyu. Si Krista mismo ang nanabi nga mag-on na kamo.”

Wala makatingog si Harvey. Nakita ni Abigail nga gipahit sa ulitawo ang ubos nga wait niini. Unya nagpanglingo kini.

“Nakasabot ka na tingali, Harvey, kun nganong gusto kong molikay nimo, di ko gustong makasamok sa relasyon ninyo ni Krista. Karon, hinaut nga dili ka na sab magsamok nako,” nagkanayon si Abigail.

Unya nananghid na si Abigail kang Harvey nga mogawas na siya sa snack bar. Dili pa unta mosugot si Harvey apan wala siya papugong niini. Migawas na siya sa snack bar. Gibiyaan lang niya si Harvey.

Mibalik siya sa school campus. Midiretso siya sa library aron magtuon. Igo lang niyang nahikyad ang iyang libro ug notebooks sa ibabaw sa lamesa, miduol kaniya si Michael. -- Sumpayan pa