Bentaha gyung di dukirok

Nindot pa unta kaayong i-internet apan sa akong pagsil-ip sa oras sa akong selpon nga akong gibutang sa kilid sa monitor alas 12:46 na sa tungang gabii mao nga gi-close ko na lang ang internet explorer dayong tindog aron mo-checkout.

Sa usa ka semana duha ka gabii kong mosulod og internet cafe aron mag-email og mga writeup sa nagkadaiyang magasin ug tabloid nga akong pagatampohan. Sa naandan matag alas singko pasado sa hapon ko mag-internet iniggawas nako sa akong gitrabahoan. Apan sukad nga nag-promo ang internet cafe nga akong suki kada alas 10:00 na sa gabii ko mag-email. Sa sayo pa gud tag P18.00 man ang oras apan ang ilang promo gikan sa alas 10:00 tag P9.00 nalang mao nga nangiyawat sab ko.

Sa akong paggawas sa internet cafe mingaw pa sa tirana ang karsada mao nga naglakaw na lang ko pauli. Ang balay nila ni Papa Segundo ug Mama Lusing may gilay-on nga kapin sa usa ka kilometro gikan sa internet cafe nga akong suki. Mitipon man lang gud kog puyo sa akong mga ginikanan sa dihang nakatrabaho ko sa gobyerno sa Lapulapu City kay ang akong kapikas ug mga anak atua man manimuyo sa Negros Occidental.

Samtang naglakaw nagkalingaw sab kog panigarilyo. Apan paghitungod nako sa usa ka internet cafe nga manera ra og alas 10:00 sa gabii, nga niadtong higayona mingaw na sab kaayo, may nalabyan kong usa ka babaye nga nagbarog.

"Hii, Miss," nako pa nga igo lang miyanghag kaniya og daklit.

"Hii sab," tubag sa babaye sa lumo kaayong panuni.

Apan sa dihang misaylo na ko og pipila ka dupa..."

"Mister!" Gitawag ko sa babaye.

Nakalingi gyud ko. "Ngano, Miss?"

"Dali sa gud."

Mora kog na-batobalani. Gibalikan ko siya.

"Kuyog ta bi."

"H-ha?" Nakalitan ko. "A-asa?"

"Diha ba," ug gitudlo sa babaye kadtong eskinita nga naatbang ra sa among gibarogan.

"Sige na, Mister," ug gigunitan sa babaye ang akong kamot ug gibira ko niya pasulod sa eskinita.

Naglain ang akong gibati. Nakaingon ko sa akong hunahuna nga "grasya na ni da". Hilabihan na ra bang mingawa niadtong mga orasa ug ngitngit pa kaayo ang maong dapit kay wa sab magsiga ang suga sa poste sa duol. Morag gituyo gyud sa kahigayonan.

Apan mipatigbabaw pa gyud ang akong ka-sinsero sa akong asawa. Giwakli ko ang iyang kamot ug mituhoy kog lakaw. "Kalakig imo diha!" nagyawyaw ko. "Nakatumong pa kang Fred Monterola, di ka gyud mahigawad. Si Fred pa nga hingaon kaayog bakasi's Cordova!

Sa nalayulayo na ko milingi ko. Didto gihapon ang babaye nagpangamay gihapon nako.

Pagkaugma sa buntag naukay ang mga residente niadtong dapit nga nasakop sa gibarugbarogan sa babaye kagabii. Sa paggikan nako aron motambong sa trabaho misalikyat ko sa naasoy'ng lugar aron magpakisusi. Ug...

Porbida! Sa kinasuokan nga bahin niadtong eskina nga gibarugbarogan sa babaye kagabii, didto'y lalake nga napalgang patay! May dinunggaban sa liog. Nagbuliskad na ang mga bulsa sa iyang karsones. Wa na gyuy kuwartang nakit-an. Wa say pitaka.

"Lain na sad ning biktima sa babayeng mangatang og lalake unya dad-on sa suok diin nagpaabot ang iyang mga kaubang mga adis-adis!"

Dihay mikomentaryo.

"Porbida! Kun dukirok pa lang gyud kog babaye, na..." nakatuaw ko sa hilom dayong biya niadtong dapita! (Kataposan)