Pauleen-Marvin break na, diamond ring gipangita

Buwag na gyud sila si Pauleen Luna ug Marvin Agustin. Kini maoy nagdahunog karon nga taho sa upat ka suok sa showbizlandia bisan man tuod og walay kumpirmasyon o namahayag sa masig habig.

Pwes pangutana karon kun giuli ba kaha ni Pauleen Luna ang giingong diamond ring nga regalo ni Marvin niya sa iyang 18th birthday kantidad og P55,000?

Hinoon duna usay miingon nga tungod kay regalo man ang maong alahas mahimo ra nga dili kini i-uli ni Pauleen.

Daghan ang giusikan sa gikatahong break-up tungod kay matud seryoso na gayud unta si Marvin kang Pauleen, gani gidungog man nga patukuran og balay ang dalaga.

Dungan niini, tak-om gihapon ang baba ni Marvin lakip na ang iyang publicist kalabot sa gikatahong break-up. Balita nga nadawat sa PangMasa mao nga dili na mokomentaryo si Marvin kalabot niini tungod kay dili siya buot nga mosamot ang kapungot sa pamilya ni Pauleen, gawas nga ang tinood nga lalake dili angay ipanabi ang kagahapon.

Samtang ang tinubdan sa PangMasa miingon nga kanunay na karon nga magbantay ang inahan ni Pauleen sa set sa "Eat Bulaga." Dugang taho mao nga bisan og malipayon si Pauleen atubangan sa camera, masulob-on kini ug kanunay maghilom kun anaa sa dressing room, buot pasabot apektado kini sa break-up.

Si Marvin lang sa tanan nga nanguyab niya ang iyang giangkon sa publiko. Apan ang taho kinahanglan nga buwagan niya ang aktor sanglit wala na makauyon ang iyang mga ginikanan niini tungod kay "dominante" nga pagkauyab si Marvin.