Agresibong mga banda gikina-hanglan sa nasud

Hugyaw ang 2006 YearEnder sa GMA-7 Kapuso Network tungod kay ang mga dagkong isyu sa nakalabay'ng tuig gipaagi og kanta-kanta kauban ang mga nanag-unang mga banda sa kaulohan.

Giunhan kini sa "Reggae Mistress" nga nibatbat sa mga isyu batok ni Presidente Arroyo basi sa mga dagkong balita nga gisumsuman sa media. Ang "dongabay band" misayok sad alang sa pagpalanog sa tanang matang sa scam sa pangagamhanan ug sa atong katilingban; hugyaw ug creative kaayo pagka-direhe ang "Kjwan" nga mipaanod sa kahanginan sa mga panghitabo may kalabotan ang nagkalandrakas nga matang sa pagtuo sama sa pista sa pangilin sa Nazareno nga nakalasan og kinabuhi, ug ang kultura sa pagpakilimos nga maoy nakaagni sa mga tawo nga mamasin makadawat sa gisaad nga P20,000 sa mga nag-unang tumatan-aw sa noontime game show "Wowowee" atol sa anniversary episode sa Ultra apan nisangpot sa usa ka makapaukay'ng trahedya; samtang ang "Shamrock" miapil sa rakrakan pinaagi sa pagpalanog sa "tibay at lakas ng Pinoy nga tema" may kalabotan ang kalamboan, kadaugan, ug kalamposan sa atong mga bag-ong bayani sa natad sa paugnat sa kusog.

Ang Bisdak nga pogi rock band "Cueshé" wa usab pabangbang sa ilang pag-jam isip mga agresibong rockista sa dihang ilang gibatbat pinaagi sa usa ka kanta ang mga hulga sa kinaiyahan ingon man trahedya nga mibanlas sa daghang mga damgo'g kinabuhi ngadto sa nagkayutik nga lubnganan. Gisaysay sa maong kanta ang mga bagyong mikuso-kuso sa nagkadaiyang parte sa nasud, pag-alburoto sa mga bulkan, pagdahili sa yuta, uup. Samtang, ang "Bayang Barrios" mikuting sa gitara sa ilang makapanlimbawot sa balhibong paghatag og katapusang pangatahoran sa tanang mga nahilambigit sa kasaysayan sa atong nasud nga mitaliwan na sa laing kalibotan sama nilang constitutionalist Cecilia Muñoz-Palma, national artist for the dance Ramon Obusan, beauty titlist ug usab aktres Rosario "Chat" Silayan-Bailon, kanhi DepEd Secretary Bro. Andrew Gonzales, FSC; Abra lone district Rep. Luis Bersamin, Jr., kanhi PNP chief Cesar Nazareno, uup.

Nasigpatan ang kaikag sa mga banda nga magmugna og mga kantang agresibo alang sa pagtawag og atensyon o pagpahigmata sa mga katawhan nga tutokan ang dagway karon sa atong katilingban. Nahimong instrumento ang mga banda nga paminawon ang mga nag-alintabong mga panghitabo sa nasud gikan sa kasamok ngadto sa mga kadaugan nga nag-isa sa atong kadungganan hangtod sa kalibutanong entablado.

Dinhing dapita naaninaw nga ang mga agresibong banda may dako gyud nga luna alang sa pagbag-o sa direksyon sa atong musika karong panahona. Ang musika nga gihulagway nga "catalyst for change", karong panahona pinaagi sa mga banda-banda makahinay-hinay og painit pa's mga pagdasig nga ang mga katawhan magpadayong magpakabana labi na sa nagdanga-danga nang bugnong lugaynon. Usab, padayon nga magsukit-sukit ug mamulso sa mga panghitabo batok kinaiyahan nga angay unta natong panalipdan kay nakakita na kita sa kabangis niini kon maoy maningil og pautang, mga tulumanon sa telebisyon nga nagsige og tuboy sa kultura sa pagpakilimos inay mohatag kanato og mga lig-on ug makatabang sa kalamboang impormasyon o kaha mohatag kanato'g giya o epektibong pamaagi sa panginabuhian. Magpadayong makigbisog alang sa paghatag og kusog sa demokrasya, ug magsalibay sa kamapasagaron nga maoy makapukan sa atong kagawasan.

Saludo ko sa head writer ug creative director sa GMA-7 Kapuso Network sa ilang yearender story nga may ulohang "Mga Ingay ng Bayan" (MIB). Gipalanog nila ang agresibong musika isip medyum sa paghulagway sa atong mga kahiusahan ug pagkapukan, kalig-on ug kahuyang, ang atong mga pagpakabana ug pagkuwang. Kining matang sa musika ang gikinahanglan sa atong katilingban. Matang sa musika nga molangkat sa mga taptap sa atong mga mata aron ipunting kini kon unsa ang atong mahatag nga kaayohan sa nasud ug motangtang sa gapos sa gibakliad tang mga prinsipyo aron gamiton kini sa pagtuboy sa matuod nga diwa sa kaangayan, kamatuoran, ug kahiusahan.