Ryan, gibabagan ni Piolo?

Disappointed si Ryan Agoncillo nga wala siya makalusad sa iyang bag-ong recording album sa ASAP, apan dali nga gipanghimakak sa mga kadagkuan sa Vicor Records nga ang tanan dili tungod ni Piolo Pascual.

Kahinumduman nga labihan ang tinubagay nila ni Ryan ug Piolo last month ug kadto tungod kay nangabubho na si Ryan kang Piolo gumikan sa kasuod sa naulahi ngadto kang Judy Ann Santos.

Nasayran nga sa Eat Bulaga gilusad ni Ryan ang iyang debut album nga giulohan og 'Lovespeak" imbes nga sa ASAP diin regular host si Piolo.

Gipasabot sa mga kadagkuan sa Vicor Records nga April 30 gayud unta ang orihinal nga launching ni Ryan apan dili puede sa ASAP tungod kay puno na ang line-up. Dili usab mahimo niadtong April 23, sanglit Universal Records Day kadto sa ASAP.

Samtang gikataw-an lang ni Ryan ang isyu nga duna na siyay anak sanglit matud pa niya kaniadto pa ang maong isyu sa dihang nagsugod pa siya sa showbiz, dungan usab sa taho kaniadto nga bayot siya.

Sharon ug Kiko nag-second honeymoon Tua sa gawas sa nasud ang magtiayong Senator Kiko Pangilinan ug Sharon Cuneta kauban ang ilang duha ka mga anak nga sila si Frankie ug Miel sanglit gisaulog nila ang ilang 10th Wedding Anniversary karong adlawa.

Ang text message sa magtiayon nga nadawat sa PangMasa nagkanayon nga una nilang giadto Hanoi in Vietnam nga matud pa mingaw ug nindot ang mga talan-awon.

Sa pagkakaron atua sila sa Bangkok Thailand ug sa Lunes pa sila mahibalik dinhi sa nasud alang sa taping ni Sharon sa iyang show. Dungan niini, gipalanog ni Sharon ang iyang kalipay nga duna na usay laing kanta niya gikan sa album nga "Sharon Sings Alcasid," ang gigamit sa GMA-7 alang sa labing bag-o nga Koreanovela sa maong network.

Ang "Pangako," maoy theme song alang sa "Love of the Condor Heroes", nga magsugod na karong Lunes hulip sa "My Name Is Kim Sam Soon", nga mahuman na karong gabii.

Lara makita sa Encantadia

Mapopos usab karong gabii ang "Encantadia, Pag-ibig Hanggang Wakas" diin si Armea (Jackie Rice) maoy koronahan isip bag-ong rayna sa Sapiro.

Dugang taho sa PangMasa nga dunay guest appearance si Miss International Precious Lara Quigaman nga maoy modala sa papel nga dalaga nga Cassandra, nga maoy koronahan usab nga bag-ong rayna sa Lireo.