Panday sa Abril pa mobalik

Hingpit na nga miretiro isip cast sa GMA-7 sitcom "Lagot Ka. Isusumbong Kita," ang comedian nga si Teri Onor gumikan kay nahiubos kini sa iyang mga kauban.

Mismong ang manager ni Teri nga si Jun Nardo ang mihukom nga biyaan na sa nahauna ang maong programa diin cast siya for two years na sanglit wala mosuporta sa iyang show ang ubang mga artista nga apil sa maong sitcom.

Nasayran nga dunay show si Teri didto sa Zirkoh bar niadtong Martes sa gabii diin iya na nga gipagya nga mutunga ang mga cast sa Lagot Ka sanglit misaad man usab sila kaniya.

Apan sa gabii na sa pasundayag si Maureen Larrazabal lang ang milugwa didto hinungdan nga gibati og kahiubos ang kampo ni Teri gumikan sa kakuwang sa suporta.

Busa sa taping sa Lagot Ka karong adlawa didto sa Ilo-ilo City wala nay apil ang beauty ni Teri Onor.

* * *

Sa Abril pa ipasalida pagbalik ang teleseryeng Panday base usab sa pamahayag nga giluwatan ni Angeli Pangilinan Valenciano kinsa mao na karon ang manager ni Heart Evangelista.

Si Angeli nga gipangumusta sa PangMasa mibutyag usab nga nagpadayon na karon ang taping nila ni Heart ug Jericho sa mga nagkadaiyang dapit sa Laguna ug Quezon.

Giangkon sa nahisgutan nga talent manager nga naglisod si Heart sa iyang taping sanglit kanunay kini nga atakihon sa iyang hubak ilabi na kon sa suok ug abogon nga mga lugar kuhaan ang mga esena.

Makaduha na masakay sa ambulansya ang young star sanglit naglisod siya pagginhawa ug ang nakaparat pa matud pa nga dili mutug-an ang aktres unsay iyang gipamati sanglit maikog kini nga mabalda ang taping.

Depression ang gitumbok nga hinungdan nganong kanunay nga hubakon si Heart nga naggumikan sa sunod sunod nga mga pagsaway ug negative write-ups nga nadawat niini ilabi na ang isyu nga nagmabdos siya ug nagpa-abort sa iyang gisabak.

Hagbay ra nga gipanghimakak ni Heart ang maong mga isyu.

Samtang gitin-aw ni Angeli nga dili tinood nga gipasagdan si Heart sa ABS-CBN sa dihang ang naulahi maoy giuwan sa mga kontrobersya ug pagsaway.

Matud pa niya nga natayming lang nga nahitabo ang trahedya sa Ultra atol sa unang anibersaryo sa Wowowee hinungdan nga ang maong hitabo maoy giuna pag-atiman sa ABS-CBN.

Gipanghimakak usab ni Angeli ang taho nga gisuklan ni Heart ang iyang 'tatay" sa Star Magic nga si Mr. Johnny Manahan ingon man ang balita nga dunay kalagot si Heart ngadto kang Bea Alonzo.

Sa pagkakaron gisubay pa ni Angeli ang mga endorsement contracts ni Heart sanglit dunay uban nga nagtinguha nga lugwayan pa ang kontrata sa naulahi samtang duna usay buot mokuha sa young star alang sa bag-o nga mga commercials.