'Boy Bawang' pelikula na

Ang gikagubtan nga corn snack nga "Boy Bawang" usa naka pelikula diin ang masuwerte unya nga bida niini mao ang hinay-hinay nga misikat nga comedian nga si Bearwin Meiley.

Usa unya kini ka horror-comedy film nga pagagam-on ubos sa Regal Films sa direksyon ni Mac Alejandre isip follow-up sa launching movie ni Bearwin nga 'Hari ng Sablay."

Si direk Mac mao usay nigunit kang Bearwin sa "Hari ng Sablay" nga gipasalida pinaagi gihapon sa Regal Films ug tungod kay maayo ang labok nga gipakita niini maoy hinungdan nga isunod ang "Boy Bawang."

Apan sa dili pa ang nahisgutan nga pelikula makita una si Bearwin sa Valentine offering sa Regal ang " I will always love you" nga gibitoonan nila ni Angel Locsin ug Richard Guttierez.

Sa nahisgutan nga pelikula love interest ni Bearwin ang komedyana nga si Tuesday Vargas diin ilang gipalanog nga nasuya sila sa mga bida kay wala sila makakuyog sa location shooting didto sa San Francisco California last year.