Chynna ug Dennis: Mga second choices lang

Managsama sila si Dennis Trillo ug Chynna Ortaleza nga matawag og second choices. Si Dennis second choice lang sa iyang papel isip usa ka transvestile sa pelikulang "Aishte Mashu 1941" kay ang maong role, gitanyag man una ngadto ni Onemig Bondoc apan gibalibaran ni Onemig kay dili pa kono siya andam sa maong matang sa role, apan nahimong dakong break ni Dennis kay tungod sa maong role, mihakot siya og daghang mga ganti.

Second choice usab si Chynna sa role isip Rebecca sa "Sugo" kay gikatakda man unta kini ni Bianca King apan naproblema ang GMA-7 sa manager ni Bianca, labi na, kay nagplano diay si Bianca nga mobalhin sa ABS-CBN.

Karon, gidayeg si Chynna isip Rebecca sa "Sugo". Giplanohan na nga himoan og pelikula ang action drama series busa, tungod kay importante kaayo ang role ni Chynna, siya gyod ang padad-on sa papel ni Rebecca sa pelikula, isip "fake" nga alay. Si Isabel Oli ang tinuod nga Alay.