Osmeña: Archival masuspenso kong aprobahan ang ordinansahon
CEBU, Philippines — Pasimple nga nikomediya si Bise Mayor Tomas Osmeña nga mahimo siya’ng acting mayor sa Dakbayan sa Sugbo kon masuspenso si Mayor Nestor Archival kon aprobahan ang gisugyot nga ordinansahon nga gamiton ang national road aron nga ma-regulate ang night market sa Carbon Public Market.
Si Osmeña niluwat sa maong pamahayag atol sa public hearing sa proposed Ambulant Vendors and Mountain Products Landing and Night Market Ordinance niadtong Martes, Nobyembre 17, 2026 diin nipahimangno kini nga posibleng moatubang og legal nga problema ang mayor kong aprobahan ang maong sugyot.
Nangutana si Osmeña kon legal ba nga gamiton isip lugar sa pagbaligya ang pipila ka bahin sa Manalili, Plaridel, Lincoln, Progreso, F. Gonzales, M.C. Briones, Calderon ug M.L. Quezon streets nga gilakip sa gisugyot nga ordinansa diin nasuta nga nalakip sa national road ang barogan sa mga tindahan.
“Ato na’ng klarohon kay I think some of the roads there are national roads. Cannot be used for vending”, matud ni Osmeña.
Gipasabot usab ni Osmeña nga adunay jurisprudence sa Supreme Court nga mahimong gamiton sa legal nga pagkontra sa ordinansahon nga posibleng mosangpot sa pagkasuspenso ni Archival ug sa iyang paglingkod isip acting mayor.
Ang ordinansahon gipangamahanan ni Konsehal Mikel Rama nga nagtumong sa paghatag og legal ug organisadong pamaagi sa dugay na’ng kalihokan sa pagpamaligya sa Carbon Public Market diin magtakda og mga landing ug vending areas alang sa mga mag-uuma, agricultural producers, wholesalers ug ambulant vendors nga nagdala og prutas, utanon, buwak ug uban pa’ng produkto gikan sa bukid.
Gipasabot sa bise mayor nga kun nasakop sa hurisdiksiyon sa nasudnong kagamhanan ang maong mga dalan dili kini basta-basta mahimong gamiton alang sa pagpamaligya nga walay legal nga pagtugot. (BANAT NEWS)
- Latest















