Nagmotorsiklo gipusil patay
CEBU, Philippines — Patay diha-diha ang usa ka 41-anyos nga lalaki human gipusil sa wala mailhing tawo samtang nagmaneho sa iyang motorsiklo sa Sitio Bugho, Barangay Bagalnga, lungsod sa Compostela, sa miaging gabii, Nobyembre 18.
Giila ang biktima nga si Jerson Batulan Cohitmingao, residente sa Purok III, Barangay Buluang, Compostela.
Base sa inisyal nga imbestigasyon sa Compostela Police Station,padulong unta sa Sitio Proper sa Barangay Buluang sakay sa motorsiklo ang biktima sa dihang kalit siyang gibabagan sa wala mailhing tawo ug gipusil makadaghang higayon.
Matud ni Police Captain Jessie Tañola, hepe sa Compostela Police Station, naigo sa mga bala ang ulo ug likod nga bahin sa lawas sa biktima.
Narekober sa crime scene ang pito ka basiyo sa bala nga gituohang gikan sa wala pa matino nga kalibre sa armas nga gigamit sa pagpatay.
Matud pa ni Tañola, sa wala pa ang pagpamusil, adunay tawo nga nagpakaaron-ingnon nga nangita og laing tawo apan ang biktima diay ang gitan-aw o gipanid-an sa lugar.
Gibutyag usab ni Tañola nga adunay kasong giatubang ang biktima niadtong 2002 ug nakagawas na sa prisohan sa wala pa ang pandemya.
Padayon ang follow-up investigation og pag susi sa mga CCTV Footage sa Compostela Police aron mailhan ang suspek ug matino ang motibo sa pagpamusil. (BANAT NEWS)
- Latest















