^

Punto Mo

Mura ang asukal, mahal ang pagdurusa!

QUESEJODA - Butch M. Quejada - Pang-masa

Hindi makatarungang sabihing mahal ang paggawa sa tubuhan habang ang mga kamay na nagbubuhat ng asukal sa ating hapag ay patuloy na kinakapos sa sahod. Ito ang matinding babala ng Unyon ng mga Manggagawa sa Agrikultura (UMA) sa Sugar Council: huwag gawing dahilan ang gastos sa paggawa para ipitin ang mga manggagawang matagal nang lugmok sa kahirapan.

Ayon kay UMA Chairperson Ariel Casilao, marami sa mga manggagawa sa tubuhan ang tumatanggap ng sahod na mas mababa sa minimum wage. Walang bayad sa overtime kahit lampas walong oras ang kayod. Ang mga “dayo,” o migranteng manggagawa, lalo na sa Batangas, ay madalas pang naghihintay ng bayad hanggang matapos ang anihan.

Sa madaling salita, pawis ngayon, bayad bukas kung minsan, kulang pa!

Sa pag-aaral ng Institute of Labor Studies (ILS) ng DOLE noong 2024, karamihan sa mga manggagawa sa tubuhan ay kumikita lamang ng P2,000 hanggang P9,800 kada buwan. Pero may planter pang nagsabing mahal na raw ang ganitong sahod. Aba, kung ganyan na kababa ang kita, saan pa hahanap ng mas murang paggawa? Sa libreng pagtatrabaho?

Mas lantad ang kalupitan sa datos ng UMA Isabela noong Marso 2026. Sa isang grupo ng 12 hanggang 15 manggagawa, kailangang maghakot at magkarga ng sampung toneladang tubo sa loob ng 11 hanggang 12 oras. Dapat P500 kada tonelada ang bayad, pero may contractor na kumakaltas ng P100. Ang resulta, halos P333 lang ang napupunta sa bawat manggagawa sa maghapong kayod.

Mas mababa pa sa minimum wage na P500 sa Region 2. Saan napupunta ang kulang? Sino ang mananagot sa overtime na hindi binabayaran?

Hindi rin dapat balewalain ang cash bonus fund. Sa crop year 2024–2025, P213.76 lang ang karaniwang bonus, habang 249,301 manggagawa ang hindi nakatanggap nito. At kapag panahon ng “tiempo muerto,” hanggang anim na buwan silang walang trabaho.

Tama namang itaas ang presyo ng asukal at molasses upang makahinga ang maliliit na planter sa taas ng gastos sa pataba at gasolina. Pero hindi dapat manggagawa ang gawing pambayad sa krisis.

Hindi magkalaban ang magsasaka at manggagawa. Pareho silang biktima ng sistemang kumakalam ang bulsa ng nasa itaas habang ang nasa bukid ay kumakalam ang sikmura.

Kung mahal ang asukal, bakit mura ang pawis ng taong nag-ani nito?

Disclaimer: Ang artikulong ito ay opinyon batay sa mga pahayag at datos na inilatag ng UMA at mga sangguniang binanggit nito. Layunin nitong ilahad ang usapin sa sahod at kapakanan ng mga manggagawa sa tubuhan.

 

SUGAR

  • Latest
Latest
Latest
abtest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

Get Updated:

Signup for the News Round now

FORGOT PASSWORD?
SIGN IN
or sign in with