Sige na lang

Usa sa mga kalisdanan nako karong mga panahona, ug dili lang tingali kay ako ra tingali ang kasagaran natong mga konsumidor sa kuryente mao man ang rotational brownouts.

Kining maong rotational brownouts nahitabo gumikan sa kakulangan na gyud sa supply sa kuryente karong mga panahona.

Daghan ang mgamaapektuhan niini. Ang mga patigayon sa mga frozen foods, ug bisan unsa tingali nga patigayon. Bisan gani sa Parokya mapalyar ang pag release sa mga certificates tungod sa brownout.

Ako gani mismo, ang malangay sa pag email alang sa atong lindog kay walay signal ug labaw sa tanan dili nato magamit ang computer kay lagi brown out.

Kining hitaboa karon nagdala og daghang discomfort alang kanatong tanan.

Kinsa man ang angayang basulon? Kinsa man ang angayang manubag? Mao na ba kini ang bag-ong normal?

Mao na ba kini ang kamatuoran nga kinahanglang atong dawaton sa pagkakaron? Maanad ba kaha kitaniini? Dili lang kini mahitungod sa resilience kondili sa Sistema.

Hinuon, sa laing bahin, kinahanglan gamiton nato ang atong sentido komon ingon man malig-on nga disposisyon aron moharong ning maong energy crisis. Ug kun duna man kitay matubag ning maong suliran unta dili pa ulahi ang tanan.

Kinahanglang molihok kita ug dili mawad-an og paglaum bisan pa man kun tingali ulahi na kaayo ang tanan.