Alerto sa mga ospital gipahugtan sa DOH

CEBU, Philippines — Gipahugtan sa Department of Health in Central (DOH)-7 ang alerto sa mga ospital ug uban pa’ng pasilidad panglawas sa rehiyon tungod sa nagkagrabeng kalidad sa hangin nga resulta sa transboundary haze isip pagpangandam sa posibleng pagsaka sa mga kaso sa respiratory illnesses.

Atol sa press conference kagahapon. si Dr. Jeanette Pauline Arellano-Cortes, medical officer sa DOH-7 nagkanayon nga usa ka draft regional circular ang gipakatap kagahapon sa buntag ngadto sa mga infirmary, DOH hospitals, provincial hospitals, Cebu ug Bohol provincial health offices, mga ospital nga gidumala sa lokal nga kagamhanan ug drug abuse and treatment rehabilitation centers.

Ang circular, nga adunay petsa nga Septiyembre 2, 2026 naghulat pa sa pag-aproba ug pirma ni DOH-7 Regional Director Dr. Joshua Brillantes.

Apan matud ni Cortes nga gipahibalo na ang mga pasilidad sa panglawas kabahin sa regional alert ug giawhag nga mangandam sa posibleng pagsaka sa mga pasyenteng adunay respiratory symptoms.

Ubos sa alerto, giawahag usab ang mga ospital nga ikonsidera ang pag-establisar og priority lanes kong mosaka ang gidaghanon sa mga pasyenteng adunay respiratory illnesses.

Gimandoan usab sila nga sigurohon nga ang emergency rooms adunay kapasidad sa pagdawat og dugang pasyente ug hapsay gihapon ang referral sa mga pasyente gikan sa lower-level facilities ngadto sa mas dagkong ospital.

Gipahinumdoman usab ang mga ospital nga susihon ang ilang imbentaryo sa mga ekipo ug tambal nga mahimong gikinahanglan alang sa mga respiratory condition nga  kalabot sa exposure sa haze.

Bisan pa sa pag-isa sa alerto, si Cortes nagkanayon nga wala pa makatala ang Regional Health Emergency Management Office (RHEMO) sa DOH-7 og respiratory illness nga direktang nalambigit sa haze hangtud kagahapon.

Giawhag sa DOH-7 ang mga vulnerable nga grupo lakip ang mga bata’ng ubos sa lima ka tuig, mga tigulang ug mga mabdos nga limitahan ang ilang mga kalihokan sa gawas samtang nagpabiling dili maayo ang kalidad sa hangin.

Samtang ang mga kinahanglang mogawas sa balay giawhag usab nga magsul-ob og N95 mask.

Ug kong walay N95 mask mahimong mogamit og surgical mask ang mga residente apan magsul-ob og duha ka layer ug siguradoho’ng husto ang pagkasigo sa mask sa ilong ug baba aron dili masudlan sa hugaw nga hangin. (BANAT NEWS)