CDO batok sa PWS hingpit na’ng gilibkas sa DENR
CEBU, Philippines — Hingpit na’ng gilibkas sa Department of Environment and Natural Resources (DENR)-7 ang cease-and-desist-order (CDO) batok sa Prime Integrated Waste Solutions Inc. sa Barangay Binaliw human sa pito ka buwan nga gipasirad-an kini tungod sa trash slide nga nahitabo niadtong Enero 8, 2026 diin 36 ka empleyado niini ang nakalas ug lakip na ang usa ka rescue volunteer.
Ang tigpamaba ug chief of staff ni Mayor Nestor Archival, Sr. Kenneth Siasar nibutyag nga nadawat na sa siyudad sa niaging semana ang opisyal nga suwat gikan sa DENR nga nagkompirma nga hingpit na’ng gibakwi ang CDO.
Ang PWS nakadawat na usab og partial lifting niadtong Abril 2026 apan limitado lang ang ilang operasyon diin gikan sa mga pribadong kompaniya pa ang ilang gipangdawat nga basura. Karon nga hingpit nang nalibkas ang CDO gipasabot ni Siasar nga dili pa kini ang timaan nga makapadala na ang siyudad og basura sa Binaliw tungod kay kinahanglan pa nga moagi sa bag-ong procurement ug bidding process alang sa garbage disposal services.
Matud ni Siasar nga tulo na ka higayon nga nagpahigayon og bidding ang siyudad apan wala mosalmot ang PWS. Sa ulahing executive session sa konseho niadtong Agosto 11, 2026, giklaro ni PWS General Manager Niño Abellana, Jr. nga nisalmot sila sa unang bidding apan na-disqualify kini tungod kay nagkuwang ang PWS sa pipila ka dokumento nga wala ma-upload sa PhilGEPS.
Ug tungod niini, wala sila makadaog bisan pa nga sila lang ang bugtong bidder.
Sa ikaduhang bidding, nidesisyon ang PWS nga huwaton ang full lifting sa CDO aron makalikay sa diskwalipikasyon samtang gipaubos sa rehabilitasyon ang pasilidad ug wala pa usab mahuman ang ilang gihimong tow cells. Gipasalig ni Abellana nga kong mahatagan sila og full lifting order posible nga moabli na sila sa sunod nga bidding ug makasugod na sila og dawat og basura gikan sa siyudad karong Agosto o sayong bahin sa Septiyembre.
Ang siyudad nagpadayon usab sa paghusay sa mga dokumento aron makabayad sa P130 milyones nga utang ngadto sa PWS nga gikan pa sa niaging administrasyon. (BANAT NEWS)
- Latest
