72-anyos nga mamuhatay og paltik nadakpan
CEBU, Philippines — Usa ka 72-anyos nga lolo ang nasikop sa kapulisan human maaktuhan nga naghimog pusil sa usa ka payag sa kabukiran sa Danao City niadtong Sabado sa hapon, Agosto 1.
Ang nadakpan mao si alyas "Titing," residente sa Purok 4, Sitio Buntod, Barangay Manlayag, Danao City, nga giingong dugay nang nagbuhat og armas.
Sumala sa Danao City Police Station, alas 2:30 sa hapon dihang nakadawat og tawag gikan sa usa ka concerned citizen nga nagpahibalo nga adunay usa ka tawo nga naghimog pusil sa maong lugar. Miresponde dayon ang mga operatiba ubos sa kamandoan ni PLTCOL Henrix P. Bancoleta ang hepe sa Danao Police Station.
Pag-abot sa lugar, ilang naaktuhan ang suspek nga naghimog pusil sulod sa usa ka payag. Gipangitaan kini og permit o dokumento nga nagtugot kaniya sa paghimo og armas, apan wala siyay maipakitang legal nga awtorisasyon.
Nasakmit sa operasyon ang usa ka KG9 firearm, tulo ka lower receiver sa KG9, upat ka bala sa .9mm, upat ka magasin, ug nagkadaiyang mga himan nga gigamit sa paghimo og armas, lakip ang lathe machine, electric grinder, bench vise, hacksaw ug uban pa.
Gidakop ang suspek alas 3:20 sa hapon ug gidala sa Danao City Police Station uban sa tanang nasakmit nga ebidensiya alang sa hustong dokumentasyon. Nag-atubang karon ang suspek og kasong paglapas sa Republic Act No. 10591 o ang Comprehensive Firearms and Ammunition Regulation Act, nga isumite sa City Prosecutor's Office. (BANAT NEWS)
- Latest
