2 impeachment isinampa uli vs VP Sara

MANILA, Philippines — Dalawang impeachment complaint laban kay Vice President Sara Duterte ang magkakahiwalay na inihain sa Kamara nitong Lunes.

Isinampa ang unang impeachment ng mga dating mambabatas na sina dating ACT Teachers partylist representative France Castro at dating Bayan Muna representative Neri Colmenares na inindorso naman ng Makabayan bloc.

Ayon kay Colmenares, may kaugnayan pa rin sa umano’y maanomalyang paggamit ni Duterte ng confidential funds ang inihain nilang reklamo.

“Today is the day. Napaaga dahil ‘yan ang epekto nung SC decision. Binago na naman nila ‘yung pag-calculate kung kelan matatapos ‘yung so called one-year bar kaya sa pagkaunawa natin, puwede na,” pahayag ni ACT Teachers Rep. Antonio Tinio, endorser ng nasabing impeachment complaint.

Sa unang reklamo, inakusahan si Duterte ng betrayal of public trust dahil sa pag-abuso umano sa kaniyang kapangyarihan sa paggamit ng P612.5 million confidential funds ng Office of the Vice President at sa panahon ng panunungkulan nito sa DepEd mula December 2022 hanggang ikatlong quarter ng 2023.

Kabilang pa sa reklamo ang pagsusumite ng liquidation report na may mga “pekeng” pangalang Mary Grace Piattos sa recipients ng confidential funds.

“Yun pa rin, katulad ng pagwaldas sa 612.5 million na confidential fund nung siya ay bise presidente at secretary ng [Department of Education]. Kasama rito yung P125 million na naubos ?in 11 days nung December 2022,” ani Tinio.

Ang ikalawang impeachment complaint laban kay VP Sara ay inihain naman nina Tindig Pilipinas convenor Kiko Aquino Dee, dating Peace secretary Ging Deles, Fr. Flarie Villanueva at iba pang youth and sectoral leaders.

Inendorso ito nina ML Partylist Rep. Leila de Lima at Akbayan Reps. Perci Cendaña at Chel Diokno.

Isinama ng Tindig Pilipinas sa reklamo ang alegasyon ni Ramil Madriaga laban kay Duterte.

“No technicality or legal loophole will clear the VP of these charges. The VP must personally answer these cases of corruption and abuse of power. She has not escaped her day of reckoning, she has merely delayed it,” ani Cendaña.

Inihayag naman ni dating Gabriela partylist representative Arlene Brosas, na ipinagdarasal nila na idedeklara ng Committee on Justice na sufficient in form and substance ang impeach complaint para umusad ang deliberasyon.