Sunog sa Mantuyong ug Guizo

CEBU, Philippines - Ang pagkasunog sa mokabat 500 kapin ka panimalay sa Barangay Guizo ug Mantuyong sa Dakbayan sa Mandaue nga nahitabo sa ala 1:45 sa kaadlawon niadtong Marso 12, 2016 maoy giisip sa Bureau of Fire Protection sa maong dakbayan nga labing dakong sunog nga nahitabo sa 2016 diin 2 mil ka pamilya ang apektado.

Si SFO1 Edgar Vergara sa Mandaue City Fire Station niingon nga ang maong sunog nga nagbilin og danyos nga mokabat sa P2.3 milyones mao sab ang sunog nga nagbilin og labing daku nga danyos sa mga nahitabong sunog sa siyudad sa mao nga tuig.

Subay usab kini sa mga natala nga sunog sa dakbayan nga nagsugod sa bulan sa Enero hangtod Disyembre, diin sa 24 ka insidente sa sunog ang nahitabo sulod sa maong tuig.

Ang mga panimalay nga nahurot og kaugdaw nga pulos  ginama sa light materials, nahimutang sa luna nga kabahin sa 9.2 ka ektarya nga gidonar ngadto sa mga sakop sa Federation of Mandaue City Urban Poor Inc. (FedMaCUPI)  nga ubos sa administrasyon ni anhing mayor Alfredo Ouano.

Ang kahagip-ot sa mga dalan sa lugar maoy nag-unang hinungdan nga ang mga bombero naglisod gyud sa pagpawong sa kayo kay naglisod man ang ilang mga firetruck sa pagpaduol alang unta sa pagpasirit og tubig aron mapawong ang nagdilaab nga kayo.

Ang kanhi administrasyon ni mayor Jonas Cortes nga nagkabuang sa pagpangita og temporaryong kabalhinan sa mga lumolupyo, gitugotan sa kagamhanan sa Lalawigan sa Sugbo nga himoong temporaryong kapuy-an ang wala na magamit nga Cebu International Convention Center (CICC) pinaagi sa pagpatukod og mga payag-payag sa sulod sa compound niini.

Nahimong evacuation camp ang compound sa CICC sa mga biktima sa sunog nga  milungtad og pipila ka bulan human usab makahukom ang kagamhanan sa pagpahigayon og reblocking sa lugar nga nasunugan sa dili pa pabalikon ang mga biktima sa pagtukod og balik sa ilang mga panimalay.

Samtang nagpabilin ang mga biktima sa evacuation center, gisagubang sa kagamhanan ang ilang nagkadaiyang suliran nga naglakip sa pagtakboy sa balatian sama sa hilanat ug pipila ka mga bata ang nasakit og dengue.

Mitumaw usab ang mga taho nga adunay pipila nga nibalik pagka cartoon girl sa maong lugar nga ang hinungdan tungod usab sa kalisod sa panginabuhi taliwala sa nagpadayong paghatag og hinabang sa kagamhanan.

Natapos ang termino ni Mayor Cortes ug nasunod ang maong suliran sa administrasyon ni Mayor Luigi Quisumbing kinsa miasumer sa katungdanan human sa iyang pagdaug sa Mayo 9, 2016 election.

Niadtong bulan sa Disyembe diin nagkaduol na ang pagsaulog sa Pasko, gipahibawo ni Mayor Quisumbing nga nagsugod na sa pagbalhin ang kapin usa ka gatos ka pamilya nga nasunogan gikan sa CICC ngadto na sa 9.2 ka ektrayang luna sa Brgy. Guizo ug Mantuyong.

Gusto sa mayor nga makabalik na og tukod sa ilang bag-ong pinuy-anan ang mga biktima sa sunog sa bag-ong giabunohan nga luna sa dili pa matapos ang buwan sa Pebrero karong bag-ong tuig. Usa ka gatos kapin ka pamilya lang una ang mahimong makabalhin samtang padayon pa ang site development ug reblocking sa lugar.

Dugang ni Mayor Quisumbing nga gusto usab niyang makabalhin na sa Dakbayan sa Lapu-Lapu ang ubang nasunogan sa dili pa mapupos ang buwan sa Marso karong tuiga aron mahawan na ang compound sa CICC.

Ang siyudad sa Mandaue nipalit og luna sa Lapu-Lapu aron maoy balhinan sa 35 porsiyento ka pamilyang biktima sa sunog kay dili na paigo ang tanang 800 kapin ka pamilya nga makabalik sa 9.2 hectares tungod sa gihimong reblocking. Ang maong luna ihatag nga libre sa siyudad ngadto sa mga nasunugan.  (BANAT NEWS)