Cashier sa botika gipatay

CEBU, Philippines — Patay ang usa ka 42-anyos nga cashier sa botika human siya gipusil sa wala mailhing lalaking nagmotor human kini nanaog sa gisakyang pasaheroang jeep diha sa V. Rama Avenue, Cebu City, Martes, Nobyembre 10, 2026.

Giila ang biktima nga si Marjorie Llagono, nga giingong wala nay kinabuhi (dead on arrival) pag-abot sa tambalanan human nakaangkon og mga samad pinusilan.

Base sa unang impormasyon, bag-o pa lang nanaog ang biktima gikan sa iyang gisakyang jeep ug nagpadulong na unta sa iyang trabaho sa dihang gipusil siya sa lalaking ga-motor.

Nakaangkon ang biktima og mga samad sa ulo ug buko-buko tungod sa pagpamusil.  Matud pa sa mga kaila niini ang mipusil kaniya.

Gidudahan usab sa pamilya nga posibleng kanhing uyab sa biktima ang suspek nga nagtrabaho isip security guard ang mamumuno.

Gibutyag sa pamilya nga nakadawat na kuno og hulga ang biktima gikan sa iyang kanhing uyab nga pusilon siya. Gituohang wala madawat sa suspek sa ilang panagbulag ug nasuko human mahibaloan nga aduna nay bag-ong hinigugma ang biktima.

Padayon pang giimbestigahan sa kapulisan ang insidente, lakip na ang pag-backtrack sa mga CCTV footage sa palibot sa lugar aron mailhan ug madakpan ang suspek ug matino ang tinuod nga motibo sa krimen. IBM BANAT NEWS