Pambansang programa para sa dating bilanggo, isinusulong ni Sotto
MANILA, Philippines — Itinutulak ni Senate President Pro Tempore Vicente Sotto III ang pagtatatag ng mas komprehensibong programa para matulungan ang mga dating bilanggo na makabalik at makapagsimula muli sa lipunan.
Sa ilalim ng Senate Bill No. 2281 o “National Reintegration Act,” itatatag ang isang pambansang balangkas na magbibigay ng suporta sa mga Persons Restored of Liberty (PRLs), kabilang ang trabaho, pabahay, edukasyon, serbisyong pangkalusugan at psychosocial support.
Ayon kay Sotto, maraming dating bilanggo ang nahihirapang makahanap ng trabaho, tirahan at muling makapag-ugnayan sa kanilang pamilya matapos silang mapalaya.
Kabilang sa mga panukala ang pagtatayo ng halfway houses, pagbibigay ng counseling, educational assistance, skills training at employment support. Layunin din nitong palawakin ang PhilHealth coverage, ipagbawal ang diskriminasyon sa trabaho laban sa mga dating bilanggo, at magbigay ng insentibo sa mga kumpanyang kukuha sa kanila bilang empleyado.
Ang Department of Social Welfare and Development (DSWD) ang mangungunang ahensiya sa pagpapatupad ng programa.
- Latest
