442 ka tawo nasikop atol sa mga operasyon sa CPPO

CEBU, Philippines — Nikabat ngadto sa 442 ka tawo ang nasikop atol sa 315 ka operasyon nga gipahigayon sa Cebu Police Provincial Office  sa tibuok probinsiya ubos sa Safer Cities Initiative niadtong Biyernes.

Sa maong gidaghanon, 296 ka tawo ang gipamulta samtang 146 ang gipasidan-an o gibuhian.

 Nikabat usab sa P127,950 ang kinatibuk-ang multa nga nakolekta atol sa maong enforcement drive.

Ang mga operasyon nagtumong sa pagpatuman sa nagkadaiyang lokal nga ordinansa ug pagpalig-on sa police visibility sa mga komunidad sa Sugbo.

Lakip sa mga paglapas nga nasuta sa kapolisan ang 64 ka kaso sa pag-inom sa pampublikong lugar, 47 ka menor de edad nga nakalapas sa curfew hours, 19 ka kaso sa pagpanigarilyo sa pampublikong lugar ug 16 ka insidente sa mga tawo nga nagsuroy-suroy sa kadalanan nga walay sinina sa ibabaw nga bahin sa lawas.

Nakatala usab og 296 ka paglapas sa mga ordinansa sa trapiko sa nagkadaiyang siyudad ug lungsod sa Sugbo nga maoy pinakadaghan nga paglapas nga natala atol sa maong operasyon.

Matud ni Police Colonel Abubakar Udang Mangelen Jr., direktor sa CPPO nga nakasentro ang Safer Cities Initiative sa pagpugong sa mga paglapas ug pagmentinar sa kahapsay sa mga komunidad.

Si Mangelen nagkanayon nga dili lang ang pagpatuman sa mga ordinansa ang gikinahanglan aron mamahimong mas luwas ang mga komunidad apan apil usab ang kooperasyon sa mga residente sa pagsunod sa mga lagda.

Gipadayagni Mangelen nga magpadayon ang police visibility ug makanunayon nga pagpatuman sa mga ordinansa uban ang pagtahod sa katungod sa matag usa.