Mga termino sa opisyales sa barangay ug SK gilugwayan

CEBU, Philippines — Gihangop ni Senador Chiz Escudero ug Cebu Provincial Board Member Celestino “Tining” Martinez ang pagpasa sa Akta Republika No. 12326 nga nagtakda og lima ka tuig nga termino alang sa opisyales sa barangay ug Sangguniang Kabataan (SK) ug nag-reschedule sa Barangay ug Sangguniang Kabataan Elections (BSKE) ngadto sa Nobiyembre 2028.

Si Escudero kinsa principal author sa maong balaodnon sa Senado nagkanayon nga gitumong sa balaod nga mahatagan og mas klarong kasigurohan ug kalig-on ang pagdumala sa mga barangay ilabina kay ang mga barangay mao ang mga frontliner sa gobiyerno sa paghatud og serbisyo publiko.

Nagpasalamat si Escudero kang Presidente Ferdinand “Bongbong” Marcos, Jr. tungod sa dali nga pagpirma niini aron mahimong balaod ang RA 12326 ingon man sa iyang mga kauban sa Senado ug mga miyembro sa House of Representatives nga nisuporta sa maong lakang.

Matud ni Escudero nga ang balaod makatabang sa pag-establisar og mas lig-on, mas episyente ug mas patas nga pagdumala sa mga barangay sa nasud.

Sa iyang bahin, si Martinez nagkanayon nga gihangop sa Liga ng mga Barangay-Cebu Province ang pagpasar sa balaod apan iyang gipahinumduman ang opisyales sa barangay nga ang dugang nga mga tuig sa katungdanan kinahanglan dunganan og mas dakong responsibilidad.

Iyang gitumbok nga ang dugang nga mga tuig dili lang angay tan-awon isip pagpalawig sa termino sa mga opisyal.

“They come with greater responsibility, higher expectations, and a deeper sense of obligation to the people we are sworn to serve, ni Martinez pa.

Matud ni Martinez nga ang dugang nga panahon sa katungdanan angay gamiton sa opisyales sa barangay aron mapakita nga takos sila sa pagsalig sa katawhan pinaagi sa sinsero, adunay katakus, daling motubag sa panginahanglan ug responsable nga nagdumala.

Giawhag usab ni Martinez ang opisyales sa barangay nga gamiton ang gipalawig nga panahon aron mapaayo ang pagdumala sa ilang mga komunidad, mapalig-on ang mga institusyon ug sestema nga nagserbisyo sa mga residente ug ipatuman ang mga reporma nga magpadayon sa paghatag og kaayohan bisan pa matapos ang ilang termino.