PSC migahin P61 milyon alang sa PNG, P15 milyon sa winners
CEBU, Philippines – Minilyon nga salapi ang giandam sa Philippine Sports Commission (PSC) nga ihatag sa top performning delegations sa 2018 Philippine National Games (PNG) diin ang Cebu City Sports Commission ug Cebu Provincial Sports Commission maoy mo-host karong Mayo 19-25.
“For this year, the teams will be LGU (local government unit) based. All the national athletes will play for their LGUs. We are giving quite a hefty sum as prize money,” matud pa ni PSC Commissioner Ramon Fernandez atol sa pinirmahay sa Memorandum of Agreement (MOA) tali sa PSC ug ni Cebu City Mayor Tomas Osmeña kagahapon.
Ang overall champion makadawat og P5 million, samtang ang second ngadto sa fifth placers mobulsa og P4M, P3M, P2M ug P1M.
Ang minilyon nga ganti kabahin lang sa P61 million nga budget sa PSC alang sa PNG. Giingon nga moabot ngadto sa P4 milyones ang gigahin nga badyet alang sa opening ceremony.
Kapin sa 9,000 ka mga atleta gikan sa nagkadaiyang dapit sa nasud ang moanhi sa harang dakbayan sa Sugbo ug mopakita sa ilang abilidad sa 21 ka events nga duwaon sa managlahing binyu nga naglakip sa Lapu-Lapu City, Naga, Danao ug Tabuelan.
Si Fernandez miingon nga mahinungdanon ang PNG tungod kay magsilbe kini nga try-out alang sa mga aspiring athletes nga gusto moduwa sa national team.
- Latest
