Upat positibo sa drug test

CEBU, Philippines - Tulo na ka mga kawani sa City Assessors Office (CAO) ang mipositibo sa drug test nga gipahigayon sa Cebu City Office for Substance Abuse Prevention (COSAP) niadtong Biyernes.

Ang tulo kabahin sa 104 nga gipaubos sa kinalit nga drug test. Ang duha niini mga job order employee ug usa ang casual.

Ang COSAP mipahigayon og kinalit nga drug test sa mga kawani sa CAO niadtong Biyernes, apan inay nga 114 ang motambong 98 lang ang mitunga ug duha niini ang napositibo. Ang nadugang mao kadtong nauwahi og drug test nga gipaubos dayon niini pagbalik sa trabaho.

Si Garry Lao, pangulo sa COSAP miingon nga ang mga empleyado sa siyudad sa Sugbo kon mapositibo sa ginadiling drugas taktakon gyud sa trabaho.

Nasayran nga ang pagpahigayon niining maong kalihokan gihimo aron pagtinguha nga drug-free ang matag buhatan ug pagsiguro nga walay luna ang mga kawani  sa gobiyerno nga tiggamitan og ginadiling drugas.

Sa laing bahin, usa ka job order nga empleyado sa munisipyo sa Daanbantayan ang napositibo usab sa drug test nga gipahigayon sa Cebu Provincial Anti-drug Abuse Office (CPADAO).

Naapil kini sa 330 ka mga empleyado nga gipaubos sa screening niadtong Lunes pinaagi sa request sa mayor sa lungsod.

Matud ni Ivy  Durano-Meca, pangulo sa CPADAO,  nga anaa sa LGU kon unsay silot nga ipahamtang batok sa mga empleyado niini nga magpositibo sa drug test. Apan kasagaran  JO nga positibo sa illegal nga drugas matangtang sa trabaho.

Samtang sa Naga City Hall 66 usab ka empleyado ang gipaubos sa drug test kagahapon ug tanan negatibo. (Erly Ann Alcontin, CNU Intern/IBM)(BANAT NEWS)