Talisay After Care gibisitahan sa taga DSWD

CEBU, Philippines — Personal nga nibisita si Department of Social Welfare and Development Assistant Secretary Jose Antonio Hernandez ug DSWD-7 Director Maria Evelyn Macapobre sa Talisay After Care Office diin gipaubos sa rehabilitation program ang mga adik nga nisurender ug gusto na nga mag-usab sa ilang kaugalingon.

Una niini ni-courtesy call sa buhatan ni Mayor Eduardo Gullas sa Siyudad sa Talisay ang maong mga opisyal aron magpasalamat sa walay pagduha-duha niini sa pagsanong sa mga hangyo sa ilang buhatan ug andam nga nitagana sa tabang.

Natagbaw ug nakadayeg ang duha ka opisyal sa suporta nga gihatag sa kagamhanan sa Dakbayan sa Talisay sa ilang programa.

Matud ni Hernandez nga mahinungdanon kaayo ang suporta sa lokal nga kagamhanan para sa malampusong tinguha sa maong programa.

Nipadayag si Hernandez ngadto sa mga adik nga dili sila mawagtangan sa paglaum aron sila magbag-o sa ilang kinabuhi.

Si Gullas sa iyang bahin nipasalig nga andam ang Dakbayan sa Talisay sa paghatag sa mga proyekto nga ikaayo alang sa tanan.

Sa nasayran, ang Talisay After Care adunay dul-an sa 100 ka drug surrenderees nga nipaubos sa rehabilitation and training programs sa tinguha nga mausab ug dili na magpangita og ilegal nga drugas.Nailhan ang siyudad sa mao nga programa. (BANAT NEWS)