Masuso gibilin diha sa barko

CEBU, Philippines - Nagubot og makadiyot ang mga sakop sa Port Police sa Dakbayan sa Sugbo niadtong nakalabay nga sayo sa gabii human usa ka batan-ong inahan ang miabandona sa iyang duha pa ka semana nga anak sulod sa usa ka barko pasado alas 6 sa gabii.

Matud pa ni Port Police Inspector Preya Athena Gestopa nga nahinabi sa Banat News gibiyaan sa 20-anyos nga inahan ang iyang anak ngadto sa igsuong babaye sulod sa usa ka barko nga paingon sa Dakbayan sa Ozamis.

Sumala pa ni Gestopa nga lumad nga taga Lanao Del Norte ang maong inahan nga usa ka estudyante sa kolehiyo sa Dakbayan sa Ozamis. Gikatahong nilayas kini human namabdos ug dinhi na sa Sugbo nanganak sa usa ka pribadong klinika sa Lungsod sa Consolacion pinaagi sa caesarian section.

Matud pang Gestopa, ang igsuon sa inahan sa masuso mibutyag nadiin-diin sila pagpangita niini hangtud nga gipahibalo na lang sila pinaagi sa text nga nia kini sa Sugbo manganakay apan walay kwarta hinungdan nga giapas nila ug gibayran ang iyang pagpanganak.

Padung na unta sila mamalik sa Mindanao nianang gabhiuna dala ang masuso apan dihang hapit na molarga ang barko, gikatahong nananghid ang inahan sa masuso nga mogamit sa kasilyas.

Gibilin niini ang anak ngadto sa igsuon apan dihang hapit nang molarga ang barko nabalaka na ang igsuon kun asa na ang inahan sa masuso maong nagpatabang na kini sa mga tripulante pagpangita niini.

Nahibaw-an na lang nila nga nikanaog na diay kini sa barko ug gibilin ang anak. Ang Port Police misuway pagpangita kaniya sa palibot apan pakyas.

Dangtan ang pipila ka minutos, ang igsuon nakadawat na usab og text gikan sa inahan sa masuso nga nag-ingong padung na kini sa airport kay molarga padung sa Manila aron manarbaho ug sila nalay pabuhion sa iyang anak.

Si Gestopa mipadala dayon og mga sakop ngadto sa Mactan-Cebu International Airport apan wala gihapon nila igkita didto ang inahan sa masuso hinungdan nga namalik na lang sila sa agi.

Tungod sa nahitabo, ang igsuon nagplano nga mopasaka og kasong abandonment batok sa 20-anyos nga inahan. (BANAT NEWS)