National Milo Olympics kulbahinam nga aksiyon nagpaabot sa unahan
CEBU, Philippines - Kulbahinam nga aksiyon ug higpit nga kumbati ang nagpaabot sa upat ka delegasyon nga mowadwad sa 7th National Milo Little Olympics nga mosikad na karong adlawa didto sa Laguna Sports Complex.
Ang defending champion National Capital Region, nga naghiusa na og puwersa karon sa South Luzon, naglaraw nga mosakmit sa ikaupat niining sunod-sunod nga kampiyonato, apan dili kini angayan nga mokompiyansa gumikan kay dekalibre ug preparado sab kaayo ang ilang mga kontra niining higayona.
Ang Team Visayas andam na sab kaayo nga mopakita sa ilang abilidad ilabi na karon nga mao kini ang pinakalig-on nga koponan nga ilang naporma gumikan sa partisipasyon sa mga atleta gikan sa Iloilo, Antique, Capiz, Dumaguete, Bacolod, Bohol ug siyempre mga Sugbuanon.
“I’m quite confident that we will have a very good performance because we have been reinforced by athletes from Iloilo, Bacolod, Dumaguete and other parts of the Visayas region,” sumala pa ni Visayas head of delegation Ricky Ballesteros.
Ang Team Visayas maoy nakaangkon sa labing unang perpetual trophy, gumikan gidominar niini ang maong torneyo niadtong tuig 2009 hangtod sa 2011.
Samtang ang Team Mindanao nagkanayon nga dili sila angayan nga kompiyansaan bisan tuod kanunay silang malansang sa ikatulong dapit.
Sa laing bahin, si Milo Sports Executive Robbie de Vera naglantaw sa unahan alang sa usa ka masadya nga kompetisyon. (BANAT PALARO)
- Latest
