SK Elections sa 2016 pa

CEBU, Philippines - Gipirmahan na ni Presidente Benigno Simeon Aquino III ang House Bill 5209 niadtong Miyerkules sa hapon  aron iuswag ang eleksiyon sa Sangguniang Kabataan (SK) sa sunod tuig.

Si provincial election officer, Ferdinand Gujilde nagkanayon kagahapon nga ang maong HB nahimo na kini karong Akta Republika 10656 ug moepekto kini human sa 15 ka adlaw gikan sa pagpublikar niini.

Ang synchronized Barangay ug SK Election ipahigayon kini sa kataposang adlaw nga Lunes sa buwan sa Oktubre sunod tuig.

Matud ni Gujilde nga nakaginhawa sila niini ug makatutok na sila og pangandam alang sa National Elections sa 2016.

Si Gujilde nagkanayon nga mokabat sa usa ka bilyon ang madaginot nga budget sa gobiyerno niining pag-uswag sa SK Elections ug mahatagan og kahigayonan ang pag-reporma sa SK.

Tungod niini, hunongon una ang pagpangrehistro alang sa SK.  (BANAT NEWS)