20 ka polis ‘drug protectors’
CEBU, Philippines - Tungod sa report gikan sa Police Coordinating Advisory Council mas gusto karon sa hepe sa Talamban Police Station pailisan ang kadaghanan sa iyang mga sakop ug kung gusto sa mga tawo, apilon siya sa pahulipan.
Ang PCAC niadtong milabay’ng Martes mibutyag nga moabot sa 20 ka mga sakop sa Talamban Police Station ang gipasanginlang protektor sa ilegal nga drugas sa ilang lugar.
Apan si Senior Inspector Bienvenido Miral atol sa pakighinabi sa Banat News miingon nga dili siya makatuo nga moabot og 20 niya ka mga sakop ang nalambigit niini, miangkon hinuon siyang duna siya’y duha ngadto sa upat ka mga sakop nga giingong tigdawatan og drug money gikan sa mga druglords diha sa ilang hurisdiksyon.
“Daghan ra kaayo nang 20, naa ko’y nadawat nga report, 3 hangtod 4 ka polis, dili pud 20 ka buok,†matud pa ni Sr. Insp. Miral.
Ang kapulisan sa Talamban duna lama’y 42 ka aktibong polis kay ang uban niini retirable ug ang uban nag schooling.
Matud pa ni Miral kung duna may lahugay gusto niyang mailisan ang iyang mga sakop ug kung mahimo lakip siya sa ibalhin kung sa tan-aw sa katawhan kanila dili na sila epektibo sa ilang trabaho.
Pasabot pa sa opisyal nga sa paglingkod pa lang niya sa maong buhatan wala na kaayo siya’y salig sa iyang mga tawo, gumikan sa mga nadungog niini nga kalambigitan sa ilegal nga kalihokan. Gipaabot sab niini ang tigom sa Barangay Pulang Bato karong sunod semana, nga diin sumala pa hinganlan sa mga barangay opisyal kung kinsa nga mga polis ang mga drug protectors.
Ang buhatan sab sa City Intelligence Branch sa CCPO mikompirmar sab nga duna silay nadawat nga report sa kalambigitan sa polis sa Talamban, apan sumala pa ni Supt. Romeo Santander ila pa kining giimbestigar. (BANAT NEWS)
- Latest
