JVR dili hatagan og blanket authority

CEBU, Philippines - Si Talisay City Mayor Johnny V. De los Reyes hayan dili hatagan og “blanket authority” sa konseho sa siyudad alang sa transaksiyon sa mga proyekto nga ang kantidad P3 milyones o ubos pa niini.

Matud ni Bise Mayor Romeo Villarante posible’ng ang mayor makasugat og legal nga problema kun hatagan kini og blanket authority tungod kay hayan dili na masubay sa mayor ang balaod ubos sa Local Government Code ug ma-bypass na unya sa mayor ang konseho. Apan matud ni Villarante nga tun-an una nila ang kabahin sa paghatag og blanket authority sa mayor. Si Villarante miingon nga natuki na nila ni Mayor JVR ug sa mga sakop sa konseho ang maong isyu nga naglambigit sa pipila ka infrastructure project.

Sa milabay’ng mga adlaw, ang mga sakop sa konseho ug ang mayor nagkabangi kabahin sa 12 ka infrastructure projects nga mokabat ngadto sa P10 milyones ang budget.

Gikwestiyon sa konseho ang transaksiyon niini tungod kay naimplementar kini nga wala pay approval sa City Council. Si Konsehal Val Ylanan maoy misugyot og resolusyon kaniadto’ng miagi’ng buwan nga hatagan og blanket authority ang mayor nga makagama og kontrata ug transaksiyon sa proyekto nga nagkantidad og P3 milyones paubos.

Apan ang mga konsehal nga ubos sa Partido Alayon nagkanayon nga kinahanglang susihon nila ang ubang transaksiyon sa executive department aron adunay “check and balance.” (/RUB)(BANAT NEWS)