Gladys balik pod sa Eat Bulaga

Kung mobalik na ang Sexbomb Girls sa Eat Bulaga matag Lunes ug Miyerkules human sila mipirma og tulo ka buwan nga kontrata ubos sa TAPE Inc., duna pay laing mobalik sa maong noontime show.

Check! Si Gladys Guevarra matud pa sa PangMasa guest ugma puhon sa Bulagaan portion sa maong noontime show. Dili pa hinoon siya diretso nga mobalik, apan daghan ang nagtoo nga mao pod kini ang mahitabo sama sa diskarte sa Sexbomb diin una silang gi-guest ug pormal na gyud nga gipapirma og laing kontrata.

Malipayong gipahibawo ni Gladys nga duna nay book 2 ang "Magic Kamison" tungod kay maayo ang response sa unang monthly episode. Sa second month makauban niya sila si Dingdong Dantes ug Karylle, sa "Little Big Rufo," sa direksiyon gihapon ni Khryss Adalia.

Kahinumduman nga na-kontrobersyal ang pag-resign ni Gladys gikan sa Eat Bulaga tungod kay wala mutuo ang kadaghanan nga isyu sa panglawas ang hinungdan. Matud pa sa mga himantayon, mabaw kini nga rason tungod kay ang ubang artista makigkamatay aron lang malakip sa labing dugay na nga noontime show sa Philippine television nga milungtad na og 28 ka tuig, unya si Gladys magsayon-sayon lang og resign.

Ang gitumbok nga hinungdan kaniadto mao ang giingong relasyon nila ni Gladys ug Janno Gibbs, isyu nga pareho nilang hugtanong gihimakak.