EDITORYAL — Pakauwaw sa China

Maisugon apan pinahimutang nga gibaraw ni Defense Secretary Gilbert “Gibo” Teodoro Jr. ang “bastos” nga taktika sa China atol sa usa ka public forum didto Seoul sa South Korea dihang gitunolan siya og papel gikan sa habig sa delegado sa maong nasud.

Si Teodoro namulong didto atol sa Seoul Defense Dialogue regional defense summit diin nanambong ang mga defense secretaries ug ministro sa nagkadaiyang mga nasud aron tukion ang mga giatubang nga hagit sa mga kanasuran para sa seguridad ug pagpadayun sa kahapsay ug kalinaw sa kalibotan.

Apan samtang dunay gitubag nga pangutana si Teodoro bahin sa gray-zone tactic sa China diha sa West Philippine Sea sa South China Sea , dunay lalaking nilipot sa iyang luyo ug gitunolan siya og papel.

Kaning gray-zone tactic mao ni ang mga aksyon para presyuron ang usa ka estado o nasud nga alang-alang matawag na giyera o moabot sap unto nga magkapinusilay.

Ang China nigamit sa gidaghanon sa ilang mga barko sa pagpanghasi sa mga Pilipino diha sa WPS sa Pilipinas ilabi na diha sa Scarborough Shoal.

Kini bisan pa man naa nay Arbitral Ruling niadtong 2016 nga nag-ingon nga walay legal nga basihan ang China pag-angkon sa maong lugar.

Si Teodoro nga murag nahibulong sa papel nga gitunol sa iya, gibasa niya kini sa hilom ug pagkasayud niyang posisyon kadto sa China bahin sa South China Sea.

Gitagsa-tagsa niya kini og basa atubangan sa tanang nanambong, pero matag argumento sa China, iyaha ning gitubag tagsa-tagsa nga dalang palabtik ngadto sa maong nasud.

Propesyonal kaayo niyang gitubag ang tanang argumento bisan pa man og sa bastos ang pamaagi sa China.

Gani, miani og masipang pakpak si Teodoro gikan sa tanang mga nanambong tungod sa pamaagi niya pagtubag ang pagbinastos sa China.

Siguradong dili kadto maoy gipaabot nga reaksyon sa China kang Teodoro anang ilang pinakalit-kalit nga pagtunol og papel para ipabasa sa iya.

Nagtuo tingali sila nga magkasapid-sapid ang dila inig tubag ni Teodoro o ba kaha dili basahon ang ilang gisuwat sa papel kay nahadlok.

Nakatilaw hinuon sila og kauwawan atubangan sa mga nanambong nga mga delegado.