Trekkers giawhag nga motabang pagpanalipod sa CCPL

CEBU, Philippines — Nanawagan si Konsehal Joel Garganera ngadto sa publiko ilabi na sa mga trekker ug hilig nga mokatkat sa bukid nga motabang sa pagpanalipod sa Central Cebu Protected Landscape (CCPL).

Si Garganera nihimo sa maong panawagan human sa mga taho kalabot sa vandalism sulod sa protected area.

Matud sa mga taho nga nadawat gikan sa mga trekker nga adunay mga insidente sa vandalism sulod sa CCPL ilabi na sa Buhisan area.

Gitumbok ni Garganera, tsirman sa Committee on Environment nga dili angay himuong lugar sa vandalism ang mga protected area ug giawhag ang mga nakakita o adunay impormasyon kabahin sa mga responsable nga motaho sa insidente ngadto sa mga hingtungdan.

Atol sa Cebu City Trail Fest 2026, gipakatap ang mga runner ug trekkers isip mga guardian ug lookout sa CCPL aron makatabang sa pag-monitor ug pagpanalipod sa lugar. Gipangayo ni Garganera ang kooperasyon sa trail community nga magpabiling mabinantayon ug motaho sa bisan unsang illegal nga kalihokan o kadaot sulod sa protected landscape.

Gibutyag ni Garganera nga mahimong silotan o makamulta nga dili moubos sa P5,000 apan dili molapas sa P500,000 ang nakahimo sa maong kalapasan ug posible usab nga mapriso sulod sa usa ngadto sa unom ka tuig depende sa nahimong kalapasan.

Dili lamang vandalism ang angay bantayan apil usab ang pagtukod og permanenteng mga estraktura nga walay hustong clearance, earth-moving activities, illegal nga pagpamutol og kahoy ug uban pa’ng mga kalihokan nga mahimong makadaot sa protected area. BDB BANAT NEWS