Empleyado na mayviolation, puwede bang mag-resign?

Dear Attorney,

May karapatan bang mag-file ng resignation kahit may violation ang empleyado? – Benjie

Dear Benjie,

Ang pagbibitiw o resignation ay ang boluntaryong pag-alis ng empleyado sa trabaho. Dahil boluntaryo, maari niya itong gawin ano man ang kanyang dahilan dahil hindi naman puwede ang involuntary servitude o pagpilit sa sinuman na magtrabaho nang labag sa kalooban.

Puwedeng mag-resign ang isang empleyado kahit na may violation siya sa kompanya basta’t sumunod siya sa terms ng employment contract katulad ng pag-render ng tamang notice period o pagsunod sa kanyang employment bond, bilang mga halimbawa.

Ngunit hindi naman ibig sabihin na nakapag-resign ang empleyado ay ligtas na siya sa mga bunga ng kanyang naging violation sa kompanya. Kahit hindi na siya empleyado, maari pa rin siyang idemanda ng civil o criminal case ng kanyang dating employer kung may sapat na pruweba.

Ang tinatapos lamang ng resignation ay ang employee-employer relationship. Kaila­ngan pa ring panagutan ng nag-resign na empleyado at ng kanyang dating employer ang mga natitirang obligasyon nila sa isa’t isa, kung mayroon man.