P791 milyong illicit cigarettes mula Singapore, nasabat ng BOC

MANILA, Philippines — Nasabat ng mga tauhan ng Bureau of Customs (BOC) ang mga illicit cigarettes, na tinatayang nagkakahalaga ng P791 milyon, sa Manila International Container Port (MICP) nitong weekend, bilang agarang tugon sa panawagan ni Pang. Ferdinand R. Marcos Jr. na paigtingin pa ang operasyon laban sa smuggling ng tabako sa bansa.

Ayon kay BOC Commissioner Bien Rubio, ang shipment, na naka-consigned sa Burias Jang Consumer Goods Trading, ay unang idineklara na naglalaman ng mga cases ng tobacco products, ngunit dahil sa “derogatory information” na natanggap ng Customs Intelligence and Investigation Service ng BOC (BOC-CIIS), nagkaroon ng duda na may laman din itong illicit cigarettes at iba pang misdeclared at undeclared items.

Matapos na matanggap ang ulat mula sa CIIS-MICP Field Station noong Mayo 2, 2024, kaagad namang nagpalabas si MICP District Collector, Mimel Talusan, ng Alert Order laban sa kinukwestiyong shipment.

Makaraan ang masusing eksaminasyon, inirekomenda ng nakatalagang customs examiner ang paglalabas ng Warrant of Seizure and Detention (WSD) sa MICP District Collector.

Noong Mayo 13, isinailalim ang shipment sa isang spot-check examination sa Designated Examination Area (DEA) ng MICP, na sinaksihan ng CIIS, Enforcement and Security Service (ESS), Customs Anti-Illegal Drug Task Force (CAIDTF), at Philippine Drug Enforcement Agency (PDEA).

Sa inisyal na eksaminasyon, ibinunyag ni CIIS Director Verne Enciso na mayroong tatlong containers ang hinihinalang naglalaman ng kontrabando.

Ang bawat container ay naglalaman ng tinatayang 1,756 master cases ng iba’t ibang brands ng mga sigarilyo, kabilang ang Golden, Bind, Double Happiness, at H&P One at heat sticks na may brands na COO at Like Premium Bluberry. 

Sinabi ni Enciso na mabilis ang naging­ aksiyon ng BOC officers matapos na makatanggap ng impormasyon hinggil sa shipment.