Philippines humanitarian contingent idedeploy sa Morocco - NDRRMC
MANILA, Philippines — Nakahanda ang pamahalaan ng Pilipinas na magpadala ng humanitarian contingent sa Morocco upang tumulong sa rescue, relief and retrieval operations sa mga naging biktima ng magnitude 6.8 na lindol doon.
“We are deeply saddened by the aftermath of the earthquake that hit Morocco. We want to assure Morocco that the Philippines is more than willing to extend assistance to support the ongoing response operations. We are organizing a humanitarian contingent for possible deployment,” saad ni National Disaster Risk Reduction and Management Council (NDRRMC) Executive Director at Office of Civil Defense (OCD) Administrator Ariel Nepomuceno.
Ang Philippine Humanitarian contingent ay magmumula sa OCD, 525th Engineering Combat Battalion of the Philippine Army, 505th Search and Rescue Group of the Philippine Air Force, Bureau of Fire Protection - Special Rescue Unit, Metropolitan Manila Development Authority (MMDA), Davao Rescue 911 at maging mga kinatawan ng Department of Health (DOH).
Sa report ng German Research Center for Geosciences nasa 2,900 katao na ang nasawi at inaasahang tataas pa habang patuloy ang search, rescue and retrieval operations.
Una nang inihayag ng Department of Foreign Affairs (DFA) na walang Pinoy na nasawi sa nasabing lindol.
Noong Pebrero 2023 ay nagpadala na rin ang bansa ng 82-man continget sa Turkiye matapos tumama ang magnitude 7.8 lindol sa hangganan ng Turkiye at Syria na ikinasawi ng 50,288 katao habang 125,857 ang nasugatan.
Sinabi ni Nepomuceno na ang malakas na lindol na tumama sa Morocco ay isang paalala sa lahat ng mga bansa na magpatuloy sa paghahanda lalo na ang pinangangambahang “The Big One”.
- Latest
