Biktima ng paputok nasa 46 na – DOH
MANILA, Philippines — Patuloy sa pag-akyat ang bilang ng mga nasugatan dahil sa paputok.
Sa tala ng Department of Health, nasa 46 na ang fireworks-related injuries. Naitala ang nasabing bilang mula December 21 hanggang 29.
Ayon sa DOH, mas mababa ito ng 21 porsyento kumpara sa kaparehong panahon noong nakaraang taon.
Sinabi rin ng kagawaran na wala pang napapaulat na kaso ng stray bullet injuries o pagkalunok ng paputok.
Ilan sa kaso ng mga sugatan ay bunsod ng ipinagbabawal na paputok tulad ng boga, piccolo at 5-star.
Batay sa datos, naitala ang pinakamaraming injuries sa National Capital Region (NCR), Ilocos, Cagayan Valley, CALABARZON (Cavite, Laguna, Batangas, Rizal, at Quezon) at Bicol region.
Aminado naman si DOH Sec. Francisco Duque III na hindi pa rin siya lubos na masaya kahit bumaba ang bilang ng firecracker related injuries, dahil target sana nilang walang masaktan, lalo’t may mga alternatibong paingay naman na hindi mapanganib.
Kabilang na rito ang mga lumang gamit na metal, torotot, pito at iba pang maaaring makalikha ng tunog sa pagsalubong sa bagong taon.
- Latest