Botika ng Bayan ni GMA nais buhayin ni Digong – Pagcor
MANILA, Philippines - Nais buhayin ni Pangulong Rodrigo Duterte ang Botika ng Bayan na programa ni dating Pangulo at Pampanga Rep. Gloria Macapagal-Arroyo, ayon kay Pagcor vice-president Arnel Ignacio.
Sinabi ni Ignacio sa media briefing sa Malacañang, mismong si Pangulong Duterte ang nagsabi na nais niyang buhayin ang botika ng bayan matapos nilang ipagkaloob kamakailan ang P5 bilyong pondo mula sa Pagcor sa Office of the President (OP).
Wika pa ni Ignacio, ang pangunahing layunin ni Pangulong Duterte ay magkaroon ng libreng gamot ang mamamayan sa pamamagitan ng botika ng bayan.
“May reseta ngang ibinigay ng ang doctor para sa maysakit na mamamayan pero paano sila gagaling kung wala naman silang pambili ng gamot kaya ito ang layunin ng botika ng bayan na ibigay ng libre ang mga gamot sa maysakit na mamamayan,” dagdag pa ng Pagcor official.
Aniya, plano ng Pangulo na ipakalat ang botika ng bayan lalo sa mahihirap na lalawigan sa bansa upang magkaroon ng libreng gamot ang mga maysakit na mamamayan.
“President Duterte wants free medicine for the poor sa pamamagitan ng Botika ng Bayan,” paliwanag pa ni Ignacio sa media briefing.
- Latest