MM mayors nagdeklara ng suporta sa Pangulo

Nagpahayag kahapon ng kanilang todong pagsuporta kay Pangulong Gloria Macapagal-Arroyo ang Metro Manila Mayors League sa pangunguna ni Quezon City Mayor Feliciano Belmonte Jr.

Sinabi ng mga alkalde ng kalakhang Maynila sa kanilang resolusyon na ang nagaganap na ingay-pulitika ay hindi nakakatulong upang lalong umunlad ang ekonomiya at lalong hindi ito nakakatulong upang makahikayat tayo ng mamumuhunan.

Anila, dapat ay isara na ng Senado ang imbestigasyon sa NBN-ZTE deal dahil nagiging sanhi ito ng pagkakawatak-watak ng taumbayan at nagiging dahilan upang manghusga kaagad ang mamamayan kaysa magkaroon ng tunay na hustisya sa pagnanasang makamit ang katoto­hanan.

Idinagdag pa ng mga alkalde, pagod na ang taumbayan sa mga away-pulitika at mas nais ng taumbayan na asikasuhin ng mga pulitiko na mapaunlad lalo ang ekonomiya at pamumuhay ng Filipino. (Rudy Andal)