Binibining Asturias “Dream Come True”

CEBU, Philippines - Wa damha sa 20-anyos nga si Valerie Faye Bantillan nga iyang maangkon ang korona isip Binibining Asturias.

Matud pa sa nakoronahan nga Binibing Asturias nga iya nga gipangandoy nga maka-angkon siya sa maong korona apan wa gyud niya damha nga magmalampuson siya karong tuiga.

Sumala pa ni Bantillan nga grabi ang kakulba ug wala siya kasabot sa iyang gibati dihang nagpadayon ang beauty pageant.

Apan dihang gipahibalo na nga siya ang midaog nag-awas ang iyang gibati kay naangkon na niya ang iyang damgo nga makab-ot niya ang titulo.

Dugang ni Bantillan nga sa question and answer portion ang iyang sekreto mao ang pagpabilin nga kalma lamang ug sa pagpaminaw og maayo sa pangutana aron usab makatubag siya og tarong.

Sumala pa niya nga bisan pa man naapektahan gamay ang iyang on the job training (OJT) wa man hinuon nakawang ang iyang paghago nga gihatag tungod kay nalangkat man gyud niya ang korona.

Matud pa niya nga gikan sa duty moderitso siya og byahi sa Asturias aron makaapil siya sa practice ug mobalik na sab sa dakbayan aron motrabaho.

Usahay ma-late siya sa iyang duty ug gani pipila ka gabii nga wala siyay tarong nga tulog.

"Fulfilling kaayo, mora’g nabawi ra tanang kakapoy, tanang walay tulog, all hardworks are paid off," matud pa ni Bantillan.

Matud pa niya nga iyang sekreto mao nga nagmatinud-anon lang gyud siya sa iyang kaugalingon ug wa siya manumbaling sa gisulti sa ubang tawo.

'Just be yourself, true beauty is inside mo-radiate ra na sa outside, ayaw huna-hunaa ang gisulti sa laing tawo, ipakita ang imong best nga kaya nimo," matud pa ni Bantillan.

Gawas sa iyang titulo nalangkat usab niya ang mga minor awards sama sa Miss Photogenic, Best in Festival Costume, Best in Production Number and Best in Casual Wear.