Faithfulness

Duha ka dagway sa Faithfulness (Pagkamatinud-anon) ang akong hisgutan karong adlawa dear okRYANians. Una mao ang kabahin sa gidangatan sa TV host nga si Vhong Navarro ug ang ikaduha mao ang pagkakaplag sa nagmilagro matud pa nga Sto. Niño diha sa Mactan, nga napalgan sa tulo ka bata sa mismong adlaw sa "Hubo" o ang pag-ilis na sa Balaang Bata og ordinary nga sapot niadtong January 24. Ayaw mo'g kabalaka, kay dili mo nako hatagan og update sa nahitabo kang Vhong kay sayud ko nga nabungog na kamo, sanglit kapin na sa semana nga mao kanay atong pamahaw, paniudto ug panihapon nga balita. Ang nakapainteres lamang nako nianang maong balita mao ang pagtulun-an nga atong makutlo gumikan sa nahitabo.

Samtang mu-uyon ko nga angayang masilutan gayud ang angayan silutan sanglit walay si bisan kinsa nga adunay katungod ug gahum pagpasakit sa iyang isigkatawo o pagpasipala niini, lahi ko og baruganan nianang maong hitabo. For me, wala unta kanang maong hitabo karon kun ang matag habig nagmatinud-anon pa sa ilang mga relasyon.

Si Vhong adunay hinigugma, but the fact nga miadto siya sa condo unit ni Deniece Cornejo, tataw nga nagmaluibon siya, wala siya nagmatinud-anon ngadto sa iyang karelasyon. Dili ko muingon nga si Deniece nagmaluibon sa iyang pagkababaye gumikan kay wala pa man mapamatud-i unsa gayud ang tinuod nga nahitabo didto sa condo unit niadtong January 17, sa gabii.

Dili nako siya hukman pero for me sipyat siya sa pagdawat og bisita sa iyang condo kun ibase sa sitwasyon nila ni Vhong. Ang January 17 nilang panagkita, maoy una nilang panagtagbo human sila nagkaila duha ka tuig na ang nilabay. It was supposedly a first date, pwede friendly date. For me, ang maong panagkita, angayan nga dili sa condo mismo kay malahi na man gud ang hunahuna ug pagbati kun sa balay diretso. Lahi na ang panahon karon. Kun ang usa ka binuhat mudiretso sa pinuy-anan, kasagaran mayawaan gayud, makahunahuna og dili mao, ilabi na kun walay laing tawo sa balay. Sa maong sitwasyon, nagmaluibon si Deniece sa angayan nga mahitabo kun first date. Kung mubalibad si Vhong nga sa publikong dapit sila mag-date, that should have been her clue that he was into something. Pero nahitabo na ang nahitabo ug dili kay sila rang duha ang angayang makat-on, kundi kita mismong tanan kabahin sa kabililhon sa pagkamatinud-anon ngadto sa atong kaugalingon ug sa isigkatawo.

Samtang sa naglabay nga mga adlaw ang mga tawo nagpanon paingon sa Mactan, dala ang ilang mga masakitan sa tinguha nga makahikap sa gikatahong imahe ni Sto. Niño nga nagmilagro matud pa ug ayuhon ang ilang mahal sa kinabuhi sa nagkadaiyang gihambin nga balatian. Ingon silang "milagro" kay lagi ang istorya mao nga nangita og duwaan ang mga bata ug maoy ilang napalgan ang imahe nga misulti matud pa og "ayaw ko ilabay kay buotan man ko."  Siguro tinuod, mahimo pud nga dili. Apan kanang mga hisgutanan kabahin og milagro angayan pa kanang pamatud-an sa Katolikong Simbahan ug mudagan pa og hataas nga panahon.  Okay raman ang muadto kita kun hain may gikatahong nagmilagro, apan angayang dili nato hikalimtan nga ang matuod nga milagro ug pagkaayo nato sa unsa man ganing balatian mahitabo lamang kun kita kanunay nga mangumpisal, musimba matag Domingo (kun ugaling dili madala’g kada adlaw) ug kinasingkasing kitang mag-ampo. Kay bisan pa og tinuod nga adunay milagro, dili kita makadawat niini kun ugaling hugaw ang atong kasingkasing ug dunot ang atong kalag.

Mag-istorya kita dear okRYANians. Pangitaa ako ninyo sa Facebook: [email protected]