ARQ Builders, Truck N' Trail abante sa conference finals

CEBU, Philippines — Ang way pildeng ARQ Builders ug defending champion Truck N' Trail mitagak sa ilang mga karibal aron pagmartsa ngadto sa final round sa tagsa-tagsa nila ka dibisyon sa Mandaue s Pride Basketball Association (MPBA) Season 2: Cebuano Cup didto sa Cebu Port Authority (CPA) gym.

Ang ARQ ni team owner Jason Arquisola nakaipsot batok sa Team Banilad-Luigi Bercede, 101-99, aron pagtikang sa kampiyonato sa South Conference.

Lima ka batos sa ARQ ang mikadlit og double figures nga gipanguohan ni Ian Ortega uban ang 26 puntos, pito ka rebounds ug tulo ka assists.

Si Jose Miguel Tabaloc miamot og 19 puntos, pito ka rebounds, duha assists, ug usa ka block samtang sila si Ron Tampus, John Paul Dugenio ug Spencer Ugsimar nagkumboya'g 31 puntos alang sa ARQ Builders, nga makigsangka sunod batok sa Agalon s Hauler alang sa korona sa South.

Ang Agalon's Hauler mi-abante human gipalagpot ang JDCB Ballers, 84-68, luyo sa paningkamot nilang James Ferraren ug Joseph Cabahug nga nagkumbinar og 40 puntos.

Sa laing bahin, ang Truck N  Trail mipabakasyon sa Rongcales Customs Brokerage, 93-79, aron pagbira og luna sa North finals.

Si Paul Sungahid maoy nangu sa Truck N' Trail bitbit ang 16 puntos. Sila si Jeric Gonzaga ug Dansoy Labata mitali og 13 ug 12 puntos samtang sila si EJ Conahap ug John Velasco midonar og tinigum nga 21 puntos.

Ang Truck N  Trail mosakbang sa Artera Builders sa North finals.

Ang Artera mipahayag sa ilang kampanya nga sakmiyon ang titulo human gipalagpot ang TSO & Co. Prayboys, 106-77.

Sila si Jeff Gudes ug Rey Gonzaga ang bida sa Artera human nagkumbinar og 38 puntos. Miabag kanila si Ukinz De los Santos nga mihipos og 14 puntos ug siyam ka rebounds.