Thompson mi-aswat sa Warriors batok Jazz
CEBU, Philippines — Si Klay Thompson mikuha og atensiyon sa iyang pagduwa isip reserve sa labing unang higayon sukad sa iyang rookie season niadtong 2012 human siya mipabuto og season-high 35 puntos aron pangulogan ang Golden State Warriors ngadto sa 140-137 nga kadaogan batok sa Utah Jazz sa NBA kagahapon didto sa Delta Center sa Salt Lake City, Utah.
Ang rookie guard nga si Brandin Podziemski nga maoy mihulip ni Thompson sa starting lineup mihimo sab og kasikas uban ang 13 puntos, walo ka assists ug unom ka rebounds.
Si Draymond Green miamot og 23 puntos samtang si Andrew Wiggins midugang og 19 puntos ug pito ka rebounds.
Wala sab magpabitin ang alas sa Warriors nga si Stephen Curry nga mihipos og 16 puntos ug 10 ka assists.
Didto sa Memphis, sila si Ziaire Williams ug GG Jackson parehong mipupo og 27 puntos sa dihang gitumba sa Grizzlies ang Milwaukee Bucks, 113-110.
Si Vince Williams midonar og 18 puntos 18 puntos ug 12 k rebounds alang sa Grizzlies.
Si Giannis Antetokounmpo mipupo og 35 puntos ug 12 ka assists apan nakawang ang ika-43 niyang double-double karong season.
Si Damian Lillard mihipig og 24 puntos ug pito ka assists, si Bobby Portis mikadlit og 15 puntos samtang si Brook Lopez adunay 14 puntos, 11 ka rebounds ug upat ka blocks sa pilderong Bucks.
- Latest