Hawks gidagit ang Bucks sa Abu Dhabi

CEBU, Philippines — Mikuha og atensiyon si Dejounte Murray sa dihang gipayaka sa Atlanta Hawks ang Milwaukee Bucks, 123-113, sa labing unang duwa sa NBA didto sa Middle East.   

Si Murray, nga gi-trade sa Spurs niadtong off-season, mi-iskor og 25 uban ang siyam ka assists ug walo ka rebounds samtang si Trae Young mikadlit og 22 puntos alang sa Hawks.

Ang alas sa Milwaukee nga si Giannis Antetokounmpo mihipos og 19 puntos sa pilderong kawas.

Sa matag higayon nga mokupot siya og bola, ang nabantog nga "Greek Freak" nakadawat og makabungog nga abiba gikan sa mga fans nga nagdasok didto sa Etihad Arena sa United Arab Emirates apan wala siya makapadasig sa Bucks nga kanunay naggukod dikan sa ikaduhang kuwarter.

Tungod niini, seguradong panimalos ang tuyo ni Antetokounmpo ug sa Bucks sa dihang ilang sangkaon og usab ang Hawks sa sumamang binyu karong Sabado.