Laing Pinoy world bantamweight title ang tirad

CEBU, Philippines — Laing Pinoy nga boksidor ang naglaraw nga mamahimong world bantamweight champion.

Sa pagka karon, dunay duha ka Pinoy nga naghari sa maong dibisyon. Kini mao sila si John Riel "Cuadro Alas" Casimero (WBO) ug Nonito "The Filipino Flash" Donaire (WBC). Ang kababayan nilang si Reymart "Assassin" Gaballo mao say WBC interim titleholder.

Karon, si Michael "Hot and Spicy" Dasmariñas nagtinguha nga makigduyog sa ilang ranggo.

Apan dakong hagit ang nag-atang ni Dasmariñas sa unahan sa dihang iyang hagiton ang way pildeng

IBF ug WBA 'Super' 118-pound champion nga si Naoya Inoue sa Japan karong Hunyo 20 (oras dinhi sa Pilipinas) didto sa Virgin Hotel sa Las Vegas.

Inilog kaayo si Inoue (20-0, 17KOs) sa tapad apan si Dasmariñas (30-2-1, 20KOs) andam nga mopas-an sa bug-at nga misyon uban ang panghinaut nga tay-ogon ang kalibutan sa boksing.

Ang modaog sa ilang sangka seguradong ma-engkuwentro sunod ni Donaire, nga nagdamgo nga hiusahon ang tanang korona sa bantamweight class ug mamahimong undisputed champion, nga mao na lamang ang dungog nga wala niya matagamtami sa mabulokon niyang karera.