Heat malaumon gihapon
CEBU, Philippines — Mitakilig og maayo ang dehado nga Miami Heat human giusban og pilde sa Los Angeles Lakers, 102-96 sa Game 4 sa ilang "best-of-seven" NBA Finals niadtong Miyerkules didto sa Orlando, Florida.
Gumikan niini, giinat sa Lakers ang ilang labaw sa serye ngadto sa 3-1 ug mipaduol ngadto sa usa na lang ka daog aron langkaton ang ika-17 nga kampiyonato sa ilang prangkisa ug bisbisan ang 10 ka tuig nga huwaw sa titulo sa Los Angeles.
Sa kasaysayan sa NBA Finals, usa pa lamang ka team ang nakampiyon human malubong og 3-1 sa usa ka best-of-seven series.
Nakab-ot kini sa Cleveland Cavaliers ubos sa pagpangu ni LeBron James niadtong 2016 batok sa Golden State Warriors.
Sa kinatibuk-an, 13 pa lamang ka teams ang nakahimo og milagro human mabiyai og 3-1 sa usa ka serye. Ang duha nahimo sa Denver Nuggets ning milabay'ng playoffs.
Bisan anaa sila karon sa nagtakilid nga posisyon, ang Heat malaumon gihapon kaayo nga sila makabangon.
"It's not like it's never been done before," matud pa ni Bam Adebayo nga mibalik og duwa niadtong Game-4, apan dili pa siyento porsiyento.
Ang Heat mosuway pag-angkon og laing kinabuhi sa dihang harungon na sab nila ang Lakers sa Game-5 karong Sabado.
- Latest